P220,000, nakurimes iti pagtagilakuan

STA. MARIA, Ilocos Sur – Sinikapan ti maysa a lalaki a nagpammarang a kustomer ti maysa a negosiante ket kinurimesna ti kuarta daytoy a naikabil iti drawer ti lamisaan.

Iti report a dimmanon iti polis ditoy, idi agarup 2:45 ti malem ti Marso 15, nakurimes ti kuarta a naikabil iti drawer ti lamisaan ti cashier iti uneg ti Angelica and Charrise Farm Supply a masarakan iti Barangay Maynganay Sur ditoy nga ili babaen ti maysa a lalaki a nagpammarang a gumatang iti bagas.

Nagpulong iti polis ni Marites Peralta, asawa ni Barangay Captain Arnel Peralta, akinkukua iti nasao a pagtagilakuan, a natakaw ti  P220,000.00 a naikabil iti drawer ket kangrunaan a suspek ti lalaki a simrek iti pagtagilakuan a nagpammarang a gumatang iti bagas.

Segun iti negosiante, simrek ti suspek iti pagtagilakuanna ket imbaga ti lalaki a gumatang iti sangasako a bagas ngem insungbat ni Peralta nga awan ti lakoda.

Kinuna ni Peralta a kiniddaw ti lalaki a mangkita ti negosiante iti sample iti bagas manipud iti kaabay daytoy nga stall.

Rimmuar ti biktima ket nangala iti sample a bagas iti kaabayna nga stall sa nagsubli ket impakitana iti suspek.

Dinawat ti lalaki a mangala ti biktima iti ad-adu pay a sample ket rimmuar manen ni Peralta sa nangala iti sample dagiti nadumaduma a lako a bagas sana impakita iti suspek.

Kinuna ti suspek nga ipakitana pay dagiti sample ti bagas iti asawana sa rimmuar iti pagtagilakuan ken nagtaray a nagpadaya.

Indagadag ni Arnie Camarillo, para lako ti negosiante,  a kitaen ni Peralta ti cashier’s table agsipud ta adda nangegna nga uni a naggapu iti uneg ti cubicle ket ditan a naduktalan ni Peralta nga awanen ti kuartana a P220,000.

Nagtaray ti sales boy a nangsurot iti suspek ngem saannan a nabirokan.

Kasta met a nangisayangkat dagiti nagresponde a polis iti pursuit operation ngem kaskasdi a didan nasapulan ti suspek.

Madama ti inbestigasion mainaig iti nasao a panagtakaw.#