P23 million grants a pangtulong iti agrikultura, impaay ti DA

CAOAYAN, Ilocos Sur — Kas suporta ti National Government iti pannakapadur-as ti agrikultura iti Ilocos Sur, nangipaay ti Department of Agriculture iti P23 million grants iti Nueva Segovia Consortium of Cooperatives a pangtulong kadagiti miembrona a kooperatiba ken indibidual a kameng.

Inyawat ni Agriculture Secretary William Dar ken ni NSCC Chief Executive Officer Divina Quemi ti P23 million grants kabayatan ti ibibisita dagiti opisial ti DA iti farm ken pasilidad ti kooperatiba iti daytoy nga ili idi Setiembre 26, 2019.

Nagatender iti pasken da Gov. Ryan Luis Singson, 1st District Representative Deogracias Victor Savellano, Caoayan Mayor Germelina Goulart ken dadduma pay nga opisial ti gobierno, kooperatiba ken sektor ti agrikultura.

Nayawat iti pasken ti grants a buklen ti financial assistance, ken farm facilities and machineries a dakkel a katulongan kadagiti mannalon tapno maparegtada nga aggamulo iti daga.

Iti panagsarita ni Sec. Dar, impasingkedna ti suporta ti administrasion ni Presidente Rodrigo Duterte iti pannakapadur-as ti agrikultura iti intero a Pilipinas pakairamanan ti Ilocos Sur. Impatalgedna a madadaan ti DA a tumulong kadagiti mannalon kadagiti kasapulanda iti panagmula ken panagapitda babaen ti panangipaayda ti grants kadagiti kooperatiba. Impalgakna ti panagtalekna iti NSCC nga addaanen iti nasurok a 200 a miembro a primary cooperatives, ken nasurok a 200,000 nga indibidual a miembro a kaaduanna ket mannalon ken mangngalap.

Pinagyamanan pay ni Sec. Dar ti Provincial Government iti panangidaulo ni Gov. Singson, ken ti Municipal Government iti suportada iti sektor ti agrikultura babaen ti panagiwarasda kadagiti farm inputs, makinaria ken pasilidad, ken itan ti itutulongda iti panaggatang kadagiti irik nga apit dagiti mannalon babaen ti pannakitimpuyogda iti National Food Authority. Dinayawna ti suporta ti Municipal Government iti organic farming babaen ti pannakagatang ti waste powderizer a makina a panggiling kadagiti basura nga agbalin nga organiko nga abono.

Inyebkas met ni Gov. Singson ti panagyamanna iti DA ken NSCC iti tulongda iti pannakapadur-as ti kasasaad dagiti umili iti Ilocos Sur nangruna dagiti adda iti sektor ti agrikultura. Impasingkedna ti agtultuloy a suporta ken pannakitimpuyog ti Provincial Government iti panagdur-as dagiti mannalon ken mangngalap.

Impeksa met ni Ms. Quemi ti ayat ken panagyamanna iti talek ken tulong ti DA nga indalanna iti NSCC a pangtulong kadagiti miembroda nangruna dagiti adda iti sektor ti agrikultura. Impaganetgetna a dakkel a tulong dayta tapno masaranay ken maparegta dagiti mannalon nga ikagumaanda a padur-asen ti benneg ti agrikultura. Impasingkedna ti agtultuloy a panangtulong ti NSCC kadagiti mannalon ken mangngalap ken dadduma pay a sektor a kameng ti kooperatiba tapno mapadur-as ti kasasaadda.

Pinagyamanan ti NSCC ti DA, Provincial Government, Municipal Government ti Caoayan, Cong. DV Savellano, ken dagiti amin a kooperatiba ken non-government organizations iti agtultuloy a suportada iti NSCC a mabigbig a maysa kadagiti kadakkelan a kooperatiba iti Pilipinas. Mabigbig ti NSCC kadagiti kadakkelan ken kabaknangan a kooperatiba iti Pilipinas nga addan dagiti sangana iti Ilocos Region, Cordillera ken dadduma a lugar.