P250,000.00 gunggona naitanggaya para pannakatiliw naglibas a balud

VIGAN CITY – Nangitanggaya ti gobierno probinsial iti P250,000.00 para iti asinoman a makaited iti impormasion nga agtungpal iti pannakakemmeg ti lider ti gun for hire group a nanglibas kadagiti guardiana idi Hunio 30.

Kinuna ni Gov. Ryan Singson nga intanggaya ti gobierno probinsial ti reward money tapno mapadaras ti pannakatiliw ni Rodrigo Abiang, alias Lodring, lider ti notorious gun-for-hire group nga agop-operate iti Ilocos Sur ken kaparangetna a probinsia ti Abra, Ilocos Norte ken La Union.

Dinawat ti gobernador ti tulong ti media iti pannakaiwaragawag iti intanggayana a reward money para iti aniaman nga impormasion nga agresulta iti pannakatiliw ti naglibas a balud.

Kinunana a mabalin nga ipatulod ti informant ti impormasion, malaksid kenkuana, kada Vice Gov. Deogracias Victor Savellano, dagiti bokal, mayor wenno barangay captain ket madadaan dagitoy a mangidanon iti impormasion iti kapolisan para iti pannakatiliw ni Abiang.

Agarup makabulanen manipud iti pananglibasna kadagiti guardiana, saan pay a natiliw ni Rodrigo Abiang, alias Lodring, lider ti notorious gun-for-hire group nga agop-operate iti Ilocos Sur ken kaparangetna a probinsia ti Abra, Ilocos Norte ken La Union iti baet ti panangsapsapul kenkuana dagiti polis.

Manipud iti provincial jail, ineskortan da provincial guard Efren Marzan, 36, ken ni Juanito Mercurio, 56, ni Abiang tapno dumatag iti korte para iti pannakabista ti kasona iti korte ti Narvacan a sumangsanguanna iti illegal a panagikut iti paltog.

Mapapati a napan nagsinanglaw dagiti guardia iti maysa a panganan iti asideg ti korte.

Idi nakauneg dagiti guardia iti pagsinanglawan, kellaat a nagtaray ni Abiang iti laud a direksion nga agpa-Abuor.
Nagresponde dagiti nagtitipon nga elemento ti CIDG, Ilocos Sur, Narvacan police ken Provincial Public Safety Company ket nangisayangkatda iti manhunt operation ngem negatibo ti resultana.

Kanaig daytoy, pinilaan ti Narvacan police da Mercurio ken Marzan iti criminal ken administrative complaints for infidelity in the custody of prisoner through negligence punishable under Article 224 of the Revised Penal Code and Gross Neglect of Duty iti Opisina ti Ombudsman idi Hulio 9.

Kinuna ni Singson a nakasuan dagiti dua a guardia tapno maipalagip ti kinaserioso ti pagrebbenganda ken awan dagiti panagliway (lapses) no adda eskortanda a balud.

Sakbay ti panaglibasna, inaresto dagiti nagtitipon nga elemento ti CIDG, Narvacan ken Santa police ni Abiang sadiay Santa babaen ti warrant of arrest nga inyisio ni Judge Sixto D. Diompoc ti RTC Branch 72, Narvacan, gapu iti kasona a frustrated murder a nai-docket babaen ti Criminal Case No. 3791-N.#