NARVACAN, Ilocos Sur – Naaramid itay nabiit ti groundbreaking ceremony para iti pannakaipatakder iti P3 milion ti pategna a kabarbaro a PNP building ditoy.
“Nagasatkami ditoy Narvacan ta naikkankami iti pondo. Ngem ad-adda koma ti pannakakita ti peace and order ditoy Narvacan,” imbitla ni Mayor Zaragoza bayat ti naangay a simple a programa.
Immatendar iti seremonia da PSSupt. George Regis, agdama a provincial director ti Ilocos Sur ken dadduma pay nga opisial ti ili ken pulisia.
Nagtaud iti gobierno nasional ti pondo ken maikatlo kadagiti madama a mabangbangon a pasdek ti pulisia iti probinsia.
Iti interbio ken ni Regis, kinunana nga iti pannakaipasdek ti baro a PNP building, manamnama a gumaed dagiti polis a mangipaay iti nasaysayaat a serbisio kadagiti umili ditoy.
“Mainspirarka a talaga no adda bukodmo a pasdek… kas met la no adda balaymo,” kinuna ni Regis.
Maipalagip a malaksid iti Narvacan, naikkan met iti pondo para iti panakaipatakder ti kabarbaro a PNP building ti Tagudin ken Sto. Domingo.
Impakaammo ni Regis a sumaruno met a maangay ti groundbreaking ti maipatakder a PNP building ti Santa, Ilocos Sur.
“Saan a nagun-od daytoy a proyekto no awan ti dakkel a suporta ti local government unit, nangruna ti munisipalidad ti Narvacan,” kinuna pay ni Col. Regis.
