P39-M bingay ti Banayoyo iti RA 7171, mayimplementar

BANAYOYO, Ilocos Sur- Nakasaganan a mayimplimentar dagiti proyekto a punduan ti municipal share daytoy nga ili manipud iti RA 7171.

Kinuna ni Mayor Severino “Binnoy” Galanga nga agdagup iti P39 a milion ti bingay ti munisipiona manipud iti RA 7171 a tinagiurayda a maruk-atan iti sumagmamanon a napalabas a bulan.

Kinunana nga inaprobaranen ti Department of Budget and Management (DBM) ti proyekto nga inlatanganda ti pondo manipud kadagiti barangay ken proyekto ti munisipio.

Kinunana nga amin a barangay ket adda proyektona ta pinaayabanna amin dagiti barangay captains tapno ibagada dagiti priority projectsda.”

Kinunana pay a pakairamanan kadagiti inlatanganda iti pondo ti farm-to-market roads, river control, rehabilitasion dagiti kalsada ken dadduma pay a proyekto a makatulong kadagiti mannalon ti tabako.

Kinunana a masapul a mangisubmitda iti DBM kadagiti proyekto a mapunduan babaen ti bingayda iti RA 7171 santo mayimplimetar dagitoy.#