P4.3-M appropriation ordinance, naaprobaran

CABUGAO, Ilocos Sur – Inaprobaran ti sangguniang bayan ti  appropriation ordinance nga agdagup iti P4.3 milion para iti farm to market roads a proyekto ti gobierno munisipal para kadagiti sumagmamano a barangay ditoy nga ili.

Inaprobaran ti konseho bayat ti naudi a sessionda ti appropriation ordinance para kadagiti farm to market roads dagiti uppat a barangay ditoy nga ili a pakaibilangan ti Barangay Cacadiran a napunduan iti P1.6 milion; Barangay Namruangan (P1.2 milion), Barangay Aragan (P500,000), ken Barangay Cuantacla (P600,000).

Inaprobaran pay ti konseho ti P350,000. para iti pavement iti asideg ti Cuantacla Elementary School.

Segun ken ni Mayor Edgar Cobangbang, naggapu ti pondo  para kadagiti nasao a proyekto manipud iti bingay ti munisipio iti R.A. 7171.

Kadagiti immun-una nga interbiona, kinuna ni Cobangbang a rumbeng laeng a maisubli para iti pagimbagan dagiti mannalon dagiti bingay ti munisipio manipud iti RA 7171.#