Footer

P50-M pategna a mula a marihuana, napag-ot, napuoran

SUGPON, Ilocos Sur – Mapattapatta nga agpateg iti P50 milion dagiti mula a marihuana a pinag-ot ken pinuoran dagiti rimmaut a polis iti uppat a plantasion daytoy maiparparit a mula iti Sitio Nagawa, Barangay Caoayan, ditoy nga ili iti rabii ti Hulio 9, 2010.

Indauluan da Police Chief Inspector Greg T. Guerrero, Police Senior Inspector Placido Alcausin, Police Inspector Benamin Zarate, Jr., ken Police Inspector Jurex Urbano dagiti nagtitipon nga elemento a nangisayangkat iti operasion a pakaibilangan ti PAIDSOTG, ISPPSC, PDEA RO 1, Sugpon police station ken Alilem Police Station babaen ti direkta a superbision ni Provincial Director Police Senior Supt. Eduardo A. Dopale.

Naikuyog iti nagtitipon nga elemento a nangisayangkat iti operasion ni Michael Angelo Patron ti Bombo Radyo Vigan.

Pinag-ot ken pinuoran ti raiding team ti agdagup iti 250,000 a fully grown a mula a marihuana ken 20,000 a seedlings a naimula iti uppat a nagsisina a plantasion iti nadakamat a sitio a mapattapatta nga agpateg iti P50 milion .

Nangibaba ti raiding team iti sumagmamano a bundle ti napag-ot a mula a marihuana tapno agpaay nga ebidensia iti operasion.

Awan ti natiliw dagiti rimmaut a mangbanbantay wenno mangtartaraken kadagiti mula a marihuana.

Iti napalpalabas a tawen, iti nadakamat a sitio ken barangay ti masansan a nakaisayangkatan dagiti operasion dagiti polis ditoy probinsia ken iti rehion gapu kadagiti plantasion a pakatartaraknan iti daytoy maiparparit a mula.#