P50,000 naited iti RIC Sucsuquit, Sto. Domingo

BANTAY, Ilocos Sur – Inawat ti Rural Improvement Club ti Sucsuquit, Sto. Domingo ti P50,000  a pundo para iti proyektoda a bangus deboning manipud ken ni Gob. Deogracias Victor “DV” Savellano bayat ti naangay nga RIC Congress ditoy idi Disiembre 21.

Kinuna ti gobernador a dagiti RIC iti sibubukel a probinsia ti katinnulong ti administrsionna para iti pannakaiyimplementar dagiti proyekto a mangparang-ay iti kabibiag dagiti umili ket inkarina pay ti panangtedna iti P50,000 kadagiti RIC nga addaan iti proyekto kas iti Sucsuquit RIC tapno adda puonanda.

Ginuyugoy pay ni Savellano dagiti immatendar nga irugida ti pannakaproseso dagiti saan a mapanpansin a bunga iti aglawlaw kas iti salamagi, pias ken dadduma pay a prutas a madaddadael.

“Saan a rumbeng a para laeng iti home consumption dagiti aramidenyo. Masapul a pagbalinentayo a negosio,” indawat pay ti gobernador.#