P580M ti kaudian a bingay ti Narvacan iti R.A. 7171 fund

Tobacco farmer (photo by Eden A. Alviar)

P10M mayalokar iti kada barangay

NARVACAN, Ilocos Sur – Agdagup iti P580 million ti kaudian a bingay ti lokal a gobierno ti Narvacan, Ilocos Sur manipud iti Virginia Tobacco Excise Fund kas sagudayen ti Republic Act. No. 7171, ken P10 million ti mayalokar iti kada barangay tapno mabenepisiaran dagiti amin nga umili
nangruna dagiti mannalon nga agmulmula iti tabako.

Dayta ti inrakurak ni Narvacan Mayor Zuriel Zaragoza kabayatan ti pannakiuman kenkuana dagiti kameng ti media. Impakaammo ti Mayor a kas kadagiti nagkauna a naawat a bingay ti Narvacan manipud iti R.A. 7171 fund, ket mayalokaran ti sag-P10 million dagiti 34 a barangay ti munisipalidad para kadagiti kangrunaan a kasapulanda a proyekto ken programa.

Inlawlawagna a kalaksidan iti pannakakonkreto dagiti farm-to-market roads, pannakabangon dagiti farmers evacuation centers, pannakaipaay dagiti farming equipments and materials, ket maipapaayan pay iti financial nga insentibo dagiti agmulmula iti tabako tapno maparegtada a mangpadur-as iti daytoy nga industria. Impakaammona a maik-ikkan iti insentibo a P5 tunggal kilo nga apit dagiti agmula iti tabako a Birhinia, ken P2 kada kilo dagiti agmula iti kadawyan a tabako.

Impakaammo pay ti mayor dagiti naglabas a proyekto ken programa ti lokal a gobierno kas ti Narvacan Mall, dagiti dua a moderno a rural health center nga addaan kadagiti nasanay a medical personnel, ken adu nga alikamen nga agserserbi kadagiti umili iti Narvacan ken uray pay dagiti agindeg kadagiti kabangi bangna a lugar. Impanakkelna pay dagiti inyusuatna a proyekto kas ti Narvacan Outdoor Adventure Hub sadiay Brgy. Bantay Abot ken Bagnet Festival a nangparegta ti sports, komersio ken turismo iti ilida.

Inrakurakna a kas panagtungpal ti lokal a gobierno iti Solid Waste Management Act, ket addaanen ti Narvacan iti mayanatup a sanitary land fill sadiay Brgy. Sucoc ken Dinalaoan a pakaibellengan dagiti basurada.

Impaganetgetna ti natibker a pagtaktakderan ti liderato ti lokal a gobierno iti pannakasaluad ti aglawlaw ken nakaparsuaan babaen ti saanda a panangipalubos ti illegal a pannakapukan dagiti kayo ken panagminas iti nangisit a darat wenno black sand mining and exploration iti masakupanda. Impakaammona ti tinawen a pannakaangay ti Piesta del Mar ken Festival of the Mountain a mangitandudo ti pannakasaluad ti kabaybayan ken kabambantayan.

Impalgak ni Mayor Zaragoza a ti nadalus, nabayag ken nalawa a padasna iti public service manipud idi napili nga Ilocos Sur Sanguniang Kabataan Federated President, kameng ti Provincial Board ken panagakemna nga alkalde ti ilida ti balonna iti panagtarigagayna iti nangatngato a saad iti probinsia tapno adda pagpilian dagiti umili iti pannagun-od iti nasayaat a panangituray iti gobierno.●