SINAIT, Ilocos Sur – Kiddawen ti grupo dagiti mannalon ti pannakaingato ti floor price ti tabako iti P65 kada kilo iti maangay a tripartite meeting.
Impalgak ni Konsehal Bernard Vicente, presidente ti gunglo dagiti agmulmula iti tabako ditoy probinsia, a daytoy ti kiddawenda iti maangay a tripartite meeting iti nagbaetan dagiti agmulmula iti tabako ken dagiti agparpartuat iti sigarilio ken traders ti tabako.
Iti napalabas a tripartite meeting, napagbalin ti floor price ti tabako a P61 kada kilo iti Class A a tabako.
Kiniddaw pay ti grupo ken ni National Tobacco Administration head Edgardo Zaragoza nga iti probinsia ti Ilocos Sur ti pakaangayan ti tripartite meeting tapno ad-adu dagiti makatabuno a mannalon.#