P70-M maipautang agmulmula iti tabako

BANTAY, Ilocos Sur – Nakasaganan ti P70 milion nga ipautang ti National Tobacco Administration para kadagiti agmulmula iti tabako iti umuna a distrito ti Ilocos Sur, daytoy ti impalgak ti maysa nga opisial daytoy nga ahensia itay nabiit.

Kinuna ni NTA Branch Manager Minerva Misal a 30 porsiento ti ngimmatuan ti maipautang a puonan kadagiti mannalon ket nakasaganan a maited ti cash component  santo maisaruno ti ganagan.

Kinuna ni Misal a limmawa ti mamulaan iti daytoy a panagtatabako nga umabot iti 484 ektaria. Agdagup met iti 791 dagiti rehistrado nga agmulmula iti daytoy kangrunaan a produkto ti probinsia.

Ti Ilocos Sur ti kadakkelan ti bingay manipud iti RA 7171 agsipud ta agtataud ditoy ti 70% iti kadagupan a produksion ti tabako iti Kailokuan.#