P750,000 naited a puonan dagiti livestock traders

CABUGAO, Ilocos Sur – Agdagup iti P750,000.00 ti inted itay nabiit ti gobierno munisipal ditoy a pagpuonan dagiti livestock traders ditoy nga ili.

Mismo nga inyawat da Mayor Edgar S. Cobangbang ken ni Vice Mayor Danny Gazmen, municipal officials a pakairamanan da Konsehal Benedict Savellano ken ABC Pres. Teddy Soller ti nasao a gatad iti grupo dagiti livestock traders bayat ti dayo a maang-angay ditoy nga ili tunggal Sabado.

Naited ti gatad a pagpuonan ti grupo dagiti livestock traders a paggatang kadagiti dingnguen kas iti baka ken nuang a maidayo ditoy nga ili.

Kinuna ni Cobangbang a nababbaba ti kiniddaw ti grupo a puonan ngem  kalpasan ti insayangkatda a panagadal, indakdakkelda ti intedda iti grupo.

Innayon ni Cobangbang a sisasagana ti gobierno munisipal a tumulong iti sektor ti agrikultura agsipud ta aggapgapu ti pondo manipud iti bingay ti munisipio iti R.A. 7171.#