Magsingal, Ilocos Sur – Para iti 2012, walo a milion ti target ti gobierno munisipal ditoy a makolekta iti tiendaan, segun iti municipal administrator.
Kinuna ni Municipal Administrator Algero Favis a kabaelan ti public market a gun-oden ti naituding a target collection a P8 milion iti daytoy a tawen.
Kinuna ni Favis nga iti umuna a kagudua ti tawen, nakakolektan ti tiendaan iti P4 milion sana innayon a saan laeng a doble ti nagpangatuan ti market collection ta umab-abut laeng idi iti P1 milion ti makolkolektada iti sigud a tiendaan.
Kinuna ti municipal administrator nga itultuloyda a padur-asen ti tiendaan gapu ta daytoy ti kadakkelan a pamastrekan ti munisipio.
Maipalagip a naiyutang iti bangko ti pinagpabangon iti public market ket aggapgapun ti pagbayad iti bukod a mapaspastrek daytoy.#
