P80,000.00 peke a kuarta, nakumpiska dagiti polis iti ikut dua a lalaki

CANDON CITY – Dua a lalaki ti nakapupok iti pagbaludan ti police station ditoy gapu iti pannakakumpiska iti ikutda dagiti peke a kuarta idi Mayo 2.

Segun iti report manipud iti polis ditoy, agdagup iti P80,000.00 dagiti peke a kuarta a nakumpiska iti ikut dagiti suspek a nainaganan a da Deomedes Aquino, 42, ken Ernesto Aquino, 70, agpada nga agnaed iti Barangay Balete, San Carlos, Pangasinan.

Sakbay daytoy, naglugan dagiti suspek iti pampasahero a dyipni a minaneho ni Rogelio Molina, 54, ken residente iti Barangay Tamurong Primero, ditoy siudad ket idi dimsaagdan, nagpleteda iti P500.

Ngem nagsuspetsa ni Molina a peke ti kuarta dagitoy ket inreklamona dagiti dua iti polis.

Ditoy a natakuatan ti sangabungkos a peke a kuarta nga ikut dagiti suspek. Naammuan nga agdagup amin dagiti sag-P500 a kuarta iti P60,000.00 idinto a P20,000.00 met ti kadagupan dagiti sag-P1,000.00.

Iti pannakaisurat daytoy, agtultuloy ti panagimbestiga dagiti polis no adda pay sabali a kakadua dagiti suspek ken no sadino ti naggapuan ti peke a kuarta.

Kanaig daytoy, nagballaag ti kapolisan ditoy kadagiti umili a miraenda a nalaing dagiti kuarta a maipasupli kadakuada amangan ketdi no peke daytoy.

Kitkitaen pay dagiti polis no nairanta ti peke a kuarta a paggatang iti butos.

Daytoy ti maikadua a gundaway nga adda naireport a nagpasupli iti peke a kuarta.

Idi napan a bulan, nagpulong ti maysa tindera nga adda puestona iti galieraan iti Sta. Catalina a peke ti pinagbayad kenkuana ti maysa a lalaki a naghalohalo iti tiendana.

Segun ken ni Norma Rabaca, 55, residente iti Barangay Cabittaogan, Sta. Catalina, naghalohalo iti puestona ti suspek a nabigbig a maysa a Roberto Poca, 29, addaan asawa, ken residente iti Barangay Tamurong ket impasuplina ti P500.

Sinuplian ni Rabaca ti kuarta ti lalaki ngem nagsuspetsa  a peke daytoy isu nga inreportna iti polis.

Ngem idi kinomprontar dagiti nagresponde a polis ti suspek, imbagana a pinagbayad ti kinapustana iti galiera ti nasao a kuarta.

Saanen a nagreklamo pay ni Rabaca idi sinuktan ti suspek ti kuarta.

Kinumpiska met dagiti polis ti kuarta tapno saanen a maaramat pay a pangallilaw.#