Pacquiao-Marquez bout: ni Manny ti nangabak: Chavit

VIGAN CITY – Kinuna ni Gov. Luis “Chavit” Singson a nalawag a ni pound-for-pound king Manny Pacquiao ti nangabak iti maikatlo a panagrupakda ken ni Manuel Marquez iti ring idi Nobiembre 13 (Nobiembre 14 ditoy pagilian).

Segun ken ni Singson, nalawag iti istatistika ti CompuBox nga ad-adu ti danog a naidisso ken naikonekta ni Pacquio kontra ken ni Marquez.

Kas maibatay iti resulta ti CompuBox, agdagup iti 578 dagiti danog ni Pacquiao  maikontra iti 436 ken ni Marquez; total punches connected – 176 a danog wenno 30% kontra iti 138 ken ni Marquez wenno 32%; jabs thrown – 304 maikontra iti 182 ken ni Marquez; jabs connected – 59 kontra 38 ken ni Marquez; power punches thrown – 274 kontra 254 ken ni Marquez; ken power punches connected – 117 kontra iti 100 ken ni Marquez.

Risiris manen ti resulta ti panagboksing da Pacquiao ken Marquez iti maikatlo a gundaway ta majority decision laeng ti nangabakan ti Filipino a kampeon.

Idi immuna a nagrupakda iti ring, draw ti resulta ti scorecard dagiti tallo a judges nupay namitlo a tinumba ni Pacquiao ni Marquez iti first round.

Iti maikadua, naideklara ni Pacquiao a nangabak babaen ti split decision.

Ipetpetteng ni Marquez nga isu ti nangabak iti immuna a dua a panagboksingda iti ring ken ni Pacquiao.

Sakbay ti panagboksingda, liamado ni Pacquiao ket naiwarwaragawag pay a tumbaenna ni Marquez tapno matulnekan no asino ti pudpudno a nangabak iti immuna a dua a panagboksingda.

Ngem nagbalin laeng a 114-114, 116-112, ken 116-114 ti scorecard dagiti tallo a judges ta ni Pacquiao ti nangitedan ti dua a judge iti 11th ken 12th round a nakaarusan ti Mehikano a boksingero.

Ngem dinepensaan ni Singson ti nasinged a gayyemna ket kinunana a ni Pacquiao ti nangabak kas nakitada a nakatugaw iti ringside.

Kinuna ni Singson a posible a saan a nakita dagiti agkunkuna a nangabak iti Mehikano a boksingero dagiti naipakapet a danog ni Pacquiao agsipud ta adayoda iti ring, kasta met nga adu dagiti Mehikano nga aggiiriag tunggal makadanog ni Marquez.

Nadakamat pay ni Singson a naduktalan babaen ti YouTube ti mapapati a narugit a taktika ti pannakiboksing ni Marquez agsipud ta binaddekan daytoy ti saka ti Filipino boxer iti sumagmamano a daras.

Kas naiparang iti YouTube, binaddekan ni Marquez ti saka ni Pacquiao iti maikanem, maikapito, ken maikawalo a rikos ken namindua iti last round.

Nupay kasta segun iti maysa nga otoridad iti boksing, ordinario ti panagbinnaddek ti agrupak a southpaw a kas ken ni Pacquiao ken ti maysa nga orthodox fighter a kas ken ni Marquez agsipud ta agpada ti lugar dagiti pasango a sakada bayat ti panagsinnarigsigda.

Uray ni Freddie Roach, trainer ni Pacquiao, kinunana nga ordinario a mapaspasamak ti pannakabaddek ti saka ti maysa a boksingero bayat ti pannakiboksingna iti ring.

Kabayatanna, kinuna ni Singson nga adda posibilidad ti panagsango manen dagiti dua iti maikapat a gundaway agsipud ta kagaten la ketdi dagiti tattao ket rinibribu manen dagiti mapan agbuya.

Iti daytoy a maikatlo a panagboksing da Pacquiao ken Marquez, garantisado nga umawat daytoy iti $22 milion (P946 million) idinto a $5 million laeng ken iti Mehikano a boksingero.#