Pacquiao vs. Mayweather

Salaysay ni Danny Antalan

No maysaka a boksingero, ania ti kaykayatmo nga aramiden iti training tapno mangabak: agbasketball wenno agbalsig iti kayo.

Nagimet iti wasay ni Floyd Mayweather, Jr. ti Estados Unidos tapno agbalsig iti dakdakkel pay ngem bagi a kayo. Daytoy ti maysa kadagiti wagasna tapno pumigsa ti bagina tapno inton agsangoda ken ni Manny Pacquiao ti Pilipinas a kampeon iti walo a dibision iti boksing, di kabaelan a dupraken ti napigsa a danog ti Pinoy. Ngem ni Pacquiao ket sabali met ti wagasna, agay-ayam ti basketball.

 

Dandanin Mayo 3 (ditoy Pilipinas) a panaglabanda idiay MGM Grandstand idiay Nevada, USA.

 

Kinapudnona, daytoy a dangadang ti kadaegan iti uneg ti 100 a tawen, no di man iti rinibo a tawen. Tagtagiuray dagiti riniwriw a fans ken disipulo ti boksing. Lima a tawen nga ininawda, adu nga estoria ti nangnangegan nga impagarup dagiti kaadduan a dinto pulos mapasamak pay daytoy a dangadang iti lona. Ngem dagitoy nga adipen ti boksing ti nangipaneknek nga aramidenda ti amin iti nagan ti boksing.

 

 

 

Daytoy a dangadang da Pacquiao ken Mayweather, saan laeng a mangbiag iti matmatayen a boksing gapu kadagiti nagkaadu a kabalubalna itan a contact sports a kas koma ti sikaten a mixed martial arts (MMA) ti UFC ken ti wrestling ti WWE agraman ti Muay Thai ken kickboxing. No di ket mangbiag ken nangbiag daytoy iti ekonomia—nangruna ti Amerika a maysa kadagiti pakapaspasamakan ti darakkel a benneg ti ay-ayam. No ti $300 a milion a premio ket addan iti lamisaan ti dua a boksingero, kasano payen ti kaadu a kuarta ti agrikos iti ima dagiti pumusta, dagiti mangan ken agabang iti hotel, dagiti agsugal iti casino ken dadduma pay nga idiay Nevada laeng a mapasamak.

 

Inatiw pay ket daytoy a damag-isports dagiti damdamag iti nadumaduma a pakaseknan iti internasional. Dakdakkel ngem iti Ferguson shooting, dakdakkel ngem iti gubat ti ISIS, dakdakkel ngem iti kaso dagiti Binay ditoy Pilipinas. Dakdakkel iti amin a damag ta dandani inoras nga adda rummuar a sabali manen a damag iti yahoo ken iti telebision.

 

Gapu iti antisipasion no apay a tinaparan no di man inartapanna ti dangadang idi da Muhammad Ali ken ni Joe Frazier, ken ti laban da Sugar Ray Leonard ken ni Marvin Hagler, Mike Tyson ken ni Lennox Lewis ken uray pay ti tinawen a Super Bowl.

 

Dagiti tattao, pagpapatanganda daytoy saanton no sino ti nangabak wenno sino ti naabak. Dagiti tattao, ti pagpapatanganda ket no kasano ti kinadaeg ti panagsinnukat ti danog, istratehia, plano ken katibker dagitoy dua a katangkenan a lalaki iti lubong. Kas iti laban da Ali-Frazier ken Leonard-Hagler, saan no sino ti nangabak wenno ti naabak kadakuada. Dagiti tattao tatta, pagpapatanganda no kasano kadaeg idi ti panaglaban dagitoy dua iti lona.

 

Ngem ita, tunggal maysa ti agbalbalin a mammadto no sino ti panagriknada a mangabak kadakuada. Ni Mike Tyson, Miguel Cotto, Evander Holyfield ti mangipadpaduyakyak a ni Pacquiao ti mangabak. Da Juan Manuel Marquez, Shane Mosley, Chris Algerri ken dadduma pay ti agkunkuna met a dakkel ti bentahe ni Mayweather.

 

Ni Pacquaio a ti kangrunaan nga igamna ket ti kasla kimat a garawna santo pay la kasla maso ti kadagsen nga imana a sigurado a mangpatumba iti kalabanna a kas kada Eric Morales, Miguel Cotto, Ricky Hatton, Oscar dela Hoya, Shane Mosley ken dadduma pay. Kabayatanna a ti epektibo a depensa ken ti naidumduma a kinautek iti dangadang iti boksing ti kangrunaan met a pagsadagan ni Mayweather. Awan ti abak ni Mayweather iti 47 a kompetisionna kabayatanna a lima ti abak ni Pacquiao ngem ketdi amang nga ad-adun ti labanna iti 56 a kapadasanna iti boksing.

 

Isu nga ita, panagkunayo, asino ti mangabak kada Pacquiao ken Mayweather? Hmm, nagadayo la ketdin ti Mayo 2.#