Pagadalan, balay, nauram

STA. MARIA, Ilocos Sur – Nagsaruno a nauram ti maysa a pagadalan ken maysa a balay iti dua a barangay ditoy nga ili idi rabii ti Disiembre 2 ken malem ti Disiembre 3.

Naireport iti polis ditoy a nauram ti Home Economics building ti Laslasong Elementary School idi agarup 11:08 ti rabii ti Disiembre 2.

Aganay a maysa nga oras sakbay a nakontrol dagiti nagresponde a bumbero ti nasao nga uram.

Mapapati a nag-overheat ti electric fan a nakagapu iti uram.

Mapattapatta nga agdagup iti P150,000.00 ti pateg ti nadadael gapu iti nasao nga uram.

Nauram met idi agarup 2:30 ti malem ti Disiembre 3 ti balay ni Bella Andrion y  Tanura, sadiay Barangay Maynganay Norte ditoy met laeng nga ili nga agdama a paggigianan ni Lolita Estoque y Labto, 53, naasawaan, housekeeper.

Mapapati a nagtaud ti uram iti kusina.#