Footer

Pagadalan iti Cabugao, I. Sur, nakaawat iti peke a bomb threat

CABUGAO, Ilocos Sur – Napasardeng ti klase iti Cabugao North Central Elementary School iti daytoy a munisipio idi bigat ti Nobiembre 12 gapu iti bomb threat.

Segun iti press release iti PNP, nakaawat ti Cabugao PS iti report manipud kenni Mr. Nestor Somera, MDRRMC Chairman ti Cabugao, Ilocos Sur maipanggep iti bomb threat a naipatulod iti maysa a nanang ti agad-adal iti dayta nga elementaria.

Nakaawat ni Florence Briones y Pacis, 28, naasawaan, agtagibalay, residente ti Brgy Alinaay, Cabugao, Ilocos Sur, iti agsasaruno a text messages nga mangibagbaga iti kaadda kano iti bomba iti pagadalan ti anakna, maigapu a nagpaarayat isuna kadagiti otoridad.

Naamuan a naggapu dagiti text message manipud iti cell phone number #09269977312.

Dagus met a nagresponde iti pagadalan dagiti kameng ti Explosive and Ordnance Division (EOD) ti Ilocos Sur Police Provincial Office (ISPPO) agarup 9:15 iti dayta met laeng a bigat.

Maysa oras a sinukisok dagiti kameng ti ISPPO ti pagadalan usarda dagiti EOD K9 nga aso ngem awan ti nabirokanda a bomba. Iti udina, indeklarada a peke ken pamutbuteng laeng ti naawat a bomb threat.

Ininbestigaranen dagiti otoridad ti nasao nga insidente tapno maamuan ti kinasiasino ti texter ken ti motibona iti pangipatulod iti peke a bomb threat. (Tawid News Team)