Pagadalan, nakaawat iti bomb threat

SINAIT, Ilocos Sur – Maysa a mangisursuro iti Sinait National High School ti nagpulong iti Sinait PS mainaig iti naawatna a bomb threat iti pagadalanda idi bigat ti Marso 4, daytoy a tawen.

Segun kenni Emerson Rebibis y Dominno, 40, naasawaan, mangisursuro ken residente ti Brgy. Jordan, Sinait, Ilocos Sur, nakakaawat isuna iti text message manipud numero +639268350126 a mangibagbaga iti kaadda iti bomba iti uneg ti pagadalan.

Dagus a nangisayangkat iti evacuation iti nasao a pagadalan nga indauluan dagiti kameng ti Sinait PS. Sinukisuk dagiti kameng ti Explosive Ordnance Disposal ti uneg ken aglawlaw ti pagadalan ngem awan ti nasarakanda a bomba.

Indeklara dagiti otoridad a natalged ti pagadalan idi 12:45 ti malem, dayta met laeng nga aldaw. Madama ti inbestigasion dagiti polis tapno maamuan ti kinaasino ken mapilaan iti kaso ti nagpatulod iti bomb threat. (Tawid News Team)