Pagadalan, natakawan

CERVANTES, Ilocos Sur – Sabali pay a pagadalan ditoy probinsia ti naireport a natakawan idi malem ti Marso 15.

Inreport ni Bacayan MariƱas, watchman, iti polis a natakawan ti Cervantes National High School a masarakan iti Barangay Rosario ditoy nga ili iti innem a computer units, 4 a monitor, ken sensilio iti nadumaduma a denominasion a mapattapatta nga agdagup iti P1,000.00.

Simrek dagiti mannanakaw iti computer room babaen ti panangdadaelda iti akinlikud a bintana ken iti kantina ti pagadalan a nangkurimesanda kadagiti sensilio.

Saan pay nga ammo ti kinasiasino dagiti mannanakaw.#