Pagadalan, natakawan

SUYO, Ilocos Sur – Nasolbaren ti panagtakaw iti maysa a pagadalan sadiay Barangay Baringcucurong, ditoy nga ili iti pannakabigbig ken pannakaipila ti kaso maikontra iti suspek iti nasao a panagtakaw.

Naipila iti Regional Trial Court, Branch 25, Tagudin, Ilocos Sur ti kaso a robbery maikontra ken ni Larry Diga Marquez, residente iti Barangay Poblacion, Sta. Maria, Ilocos Sur kalpasan a binigbig ti watchman nga isu ti nagtakaw iti Suyo National High School idi rabii ti Septiembre 22.

Natakaw iti pagadalan ti pito a CPU ken 6 a monitor ti kompiuter.

Naduktalan laengen ti panagtakaw iti agarup alas 8:00 ti kabigatanna babaen ti maysa nga estudiante ket impulongna daytoy iti maestrana a nangireport met ken ni Principal Josie B. Avisa.

Iti panagimbestiga dagiti polis, nakastrek ti suspek iti library ti nasao a pasdek babaen ti panangdadaelna iti padlock ti ridaw. Ditoy met laeng ti nagnaan ti suspek iti panangiruarna kadagiti tinakawna.

Immuna a sinuspetsa ti polis ni Chester Glenn Rello y Baguitan, 36, baro, residente iti nadakamat a barangay, ken watchman ti pagadalan idi mapattapatta a napasamak ti panagtakaw, ngem nabigbig daytoy ti suspek.#