Pagadalan, natakawan

STA. CRUZ, Ilocos Sur – Kuarta ken radio cassette player ti natakaw iti maysa a kuarto ti Villa Hermosa Elementary School, Barangay Villa Hermosa ditoy nga ili a mapapati a napasamak iti nagbaetan ti Agosto 30 ken 31.

Natakaw iti kuarto ni Genoveva Paa y Jimenez, 42, naasawaan, maestra, ken residente iti Sitio Baliw ditoy met laeng a barangay ti maysa DVD radio casette player ken P5,000.00.

Segun ken ni Paa, nagklase idi Agosto 30 ket pinanawanna ti kuartona a nakakandado ngem idi mapan agisuro iti agsapa ti Septiembre 1, naduktalanna laengen a lima a pedaso ti jalousie ti naikkat ken awanen ti radio cassette player ken P5,000.00 a kinurimes dagiti di pay am-ammo a mannanakaw.

Iti panagimbestiga ti polis-Santa Cruz, nakaalada iti lemma iti ramay iti naikkat a jalousie ket daytoy ti insubmiteda iti Crime Laboratory Office, Candon City, Ilocos Sur para iti posible a pakaammuan iti kinaasino ti nagtakaw.#