Pagadalan, natakawan

BANTAY, Ilocos Sur – Sinerrek dagiti mannanakaw ti Bantay West Central School, Zone 5 idi kaawan ti klase ket kinurimesda ti maysa a DVD player ken dagiti speaker.

Naduktalan ni Joselito Javier y Rivera, 52, naasawaan, administrative aide, ti panagtakaw idi binisitana ti pagadalan idi malem ti Domingo, Pebrero 1.

Iti panagsukimat ni Javier, nakitana a naporsar a naluktan ken nadadael ti window grills ken jalousie blades ti opisina ti prinsipal.

Naduktalanna pay a lima a kuarto a pakairamanan ti school canteen ti sinerrek dagiti di nabigbig a mannanakaw.

Kas maibatay iti panagimbentario dagiti mangisursuro, natakaw ti DVD player ken speakers nga agbalor iti P4,000.00.

Masuspetsa a sinerrek dagiti mannanakaw dagiti kuarto idi rabii ti Biernes wenno rabii ti Sabado.#