Pagadalan, sinerrek ti mannanakaw

VIGAN CITY – Naserrek ti canteen ti maysa a pagadalan a masarakan iti Barangay III, ditoy siudad idi rabii ti Oktubre 28 a nakakurimesan dagiti tagilako ditoy.

Inreport ni Marivic Raboy y Ancheta, 29, naasawaan, mangisursuro, iti polis nga idi agarup 915 ti bigat ti Oktubre 29, naserrek ti canteen ti Burgos Memorial School East ket natakaw ti lakoda a sangapulo a pedaso ti assorted biscuits, 10 Minute Maid juice ken 3 kilos a bagas.

Naduktalan ti panagtakaw idi aglukat ni Marcos Dasugo y Pajarillo, dianitor ti nasao a pagadalan, iti agarup 7:00 ti bigat ti nadakamat a petsa.

Naitudo ti mannanakaw a maysa a Richard Blue Ramos, 18, ken residente iti Paa Street, San Julian Sur, Vigan City.

Iti panagimbestiga dagiti polis, nakastrek ni Ramos iti canteen babaen ti panangdadaelna iti metal grill iti likud ti canteen.#