Pagadalan ti agrikultura, naluktan

SAN JUAN, Ilocos Sur -Kagiddan ti panangselebrar ni Gov. Luis “Chavit” Singson iti maika-70 a panagkasangayna, nailukat ti Ilocos Sur Community College (ISCC) School of Agriculture  sadiay Barang-ay demo farm ditoy nga ili idi Hunio 21.

Tarawidwidan ti ISCC daytoy pagadalan babaen ti pannakitinnulong ti Technical Education Skills and Development Authority (TESDA) a nangipaay iti Certificate of Program Registration para iti kurso nga Animal production NC II.

Segun ken ni Dr. Cesar Soller, demofarm manager  ken maysa kadagiti mangisuro iti nadakamat a kurso, napanunot ti gobierno probinsial ti mangituyang iti kurso a panagpaadu iti dingo gapu ta maang-angkat ti 50% ti karne a mailaklako iti agdama iti Ilocos Sur manipud iti Pangasinan, Bulacan ken dadduma pay a probinsia.

“Agpayso a saantayon nga agang-angkat iti bagas, mais ken nateng ta umdas ti produksiontayo ngem adu ti pagkurangantayo iti suplay ti karne,” kinuna ni Soller.

Kinuna met ni Singson a dakkel ti maaramidan ti pannakalukat ti nadakamat a kurso kadagiti agtartaraken iti dingo nangruna kadagiti taga-Sinait, Cabugao, San Juan, Magsingal ken dadduma pay a nga ili nga asideg iti demofarm ti probinsia.

“Makasursuro dagiti kaprobinsiaantayo iti kabaruanan a teknolohia iti panagpaadu iti dingo ket kagiddan dayta ti isasayaaat ti puli dagiti tarakentayo,” kinuna ti gobernador.

Kabayatanna, indawat ni Vice Governor Deogracias Victor Savellano a saan koma a barengbarengen dagiti estudiante ti panagadalda iti nasao a kurso tapno makatulong dagitoy saan laeng nga iti panagbiagda no di pay iti komunidad.

Pinagyamanan pay ni Savellano ti TESDA iti tulongda tapno mapadaras ti pannakaaprobar dagiti kasapulan a requirements ti kurso.

Iti agdama, adda 65 nga estudiante a nagpalista iti kurso nga Animal Production NC II a maisuro iti ISCC Demofarm Campus.

Nagiwaras pay da Singson ken Savellano iti baka a Brahman, kalding a boer, Ilocos Sur super chicken, bukel ti agduduma a nateng, seedlings ti papaya, katuday, marunggay ken dadduma pay para kadagiti organisasion kas maysa a proyekto a pangalaw iti panagbisin. (Mancielito S. Tacadena)