Footer

Pagalagadan (Maikatlo a paset)

Saanak lattan a nagun-uni.

No asino pay dagiti kakaasi a mangar-aramid iti akemna, isuda pay ti madildillaw ken mayar-aramidan iti isyu. Di ngata makita dagita a nagannak ti nagluposan ti pagadalan. Ngannganin heat shield amin a sim ti pagadalan, saanen a kas idi a G.I. sheet nga awan pay ti makatawen, buttawen ta asidegkami la ngarud iti baybay. Adda payen computer room a napnapno iti computer unit.

Kasta met a ngimmato iti kasta unay ti performance ti pagadalan iti tinawen a NAT. Napasamak amin dagitoy iti panangisakripisiomi ti aldaw a para koma iti pamiliami—ti aldaw ti Sabado, tapno agparebiu.

No dagiti dadduma a pagadalan, adda nalimed a sirib dagiti liderna maipanggep kadagiti proyekto, iti pagadalanmi, awan dayta. No ania ti pudno a gatad ti magatang a para pagadalan, isu ti mailanad iti report. Awan ti nakalemmeng a porsiento a para iti prinsipal wenno iti disbursing officer. Ngem kadagiti dadduma, permi a pagliksabanda dayta a banag. SOP kano.

Kinapudnona, kakaasikami nga agsapsapul iti panglakagan ti pagadalan. Dagiti mainutmi, mainayon a para proyekto. Kas iti pannakapa-heat shield ti maysa a kuarto. Agarup agsangagasut a ribu ti badyetna ta sumangkangina pay ti stainless a lansa a mausar. No la ngamin ordinario nga umbrella nail, ti maaramat, awan pay makatawen, nadadaelen.

Adda bileg ti pagadalan a mangiwayat iti proyekto a nababbaba ngem sangagasut a ribu ti badyetna. Ket adda nainutmi a duapulo ket lima a ribu a pisos nga isu ti impaigatangmi iti kayo a tugaw a naipan iti maysa a kuarto.

No napan koma iti contractor dayta, awan a pulos ti nadildilamut ti pagadalan. Wenno no iti sabali a pagadalan, mabalin a nagbibinggawan dagiti maseknan ti nainut a kuarta. Kayat ni prinsipalmi, transparent amin a report.

“Nagbassit la ngaruden ti pagadalantayo, pagganarantay’ pay? Saan koman!” sangkakunana. “Isu a kayatko, no ania ti agpayso a binayadantayo kadagiti naggatangantayo, isu ti paipantayo iti resibo.”

Ket limed a dinaydayawko ni Sir Omar. Kagurana la unay ti SOP!

Maysa pay, apay a saan nga agkutak dagiti nagannak kadagiti pagadalan wenno opisina ti gobierno nga adu ti empleadona nga addaan iti sakit nga AIDS? Isuda dagiti kudit a kudit iti sango ti lamisaanda a kasla dida payen magabenan ti trabahoda. Antagayam, facebook ken instagram ti as-asikasuenda. As if doing something, AIDS, ti timmulangen a sakitda!

Iniddepmi ti selponmi tapno mayulomi ti topiko dagiti speakers. Pangaldawen idi luktanmi dagitoy iti restaurant a pangananmi. Saanen a nanayonan dagiti komento.

Naumada met la ngata, nakunak iti nakemko. Saanko metten a pinatuloy ti sungbatko koma.

MALEM ti Domingo. Limmabas iti wall-ko ti poste ni Manang Weng.

Silence means… yes! naikomentona. Kayatna ngata a riingen dagiti kaduana ta nagulimekda metten.

Kunam pay, kons. Dida makasao ta pudno dagiti nasaotayo. Magreklamo na tayo.

W8 lng, mars. Palpasentay’ pay ti eksamen dagiti annaktayo.

Lima minuto pay laeng dagita a komento.

Saankon a nasarkedan ti bagik. Impanalbaagko ti nabayagen a mulmulmolan ti isipko.

(ADDA TULOYNA)