No maminsan, nasaysayaat ti agulimek. Iti panagulimek, masebseban ti apuy. Iti panagulimek, mautob ti bukod a bagi. Ket bayat ti panagulimekko, pinampanunotko no ania la unayen dagiti rasontayo a mangdadael iti pagadalantayo gapu laeng kadagiti pagalagadan a nataming ditoy a patangan.
Inuraymi a rummuar, mairuaryo amin nga an-anek-ekenyo. Iti kasta, ammomi ti pangrugianmi. Ken ammomi no pangsiriganmi iti bagbagimi.
Agyamankami, kakabsat, kadagiti komentoyo…
Ket dinakamatko ti side-ko iti maipanggep iti darekdek. Ken ti mabalin a kasukat ti darekdek no awan ti maitedda. Nga am-amang pay nga ar-aramiden ti eskuela!
Intuloyko manen idi awan latta ti agkomento kalpasan ti lima minuto:
Maawatanmi ti/dagiti sentimientoyo. Ket addakami ditoy a dumngeg kadagita. Ngem kasla saan sa a mayannatup ditoy social media a pangtratarantayo kadagita a parikut… no agpayso man a parikut.
Ti pagadalan, sidadaan a dumngeg kadakayo. Addaantayo ti timek. Usarentayo koma ngarud a mangidanon kadagiti rikriknaentayo a saan a ‘tay wagas a puorantayo ti bukodtayo a pagtaengan.
Kadagiti simmagsagpaw laeng, a dida ammo ti pudno a paspasamak, maawatandakayo met. Nailuyoskayo laeng siguro kadagiti kalugaran ken gagayyemyo.
Ngarud, para iti nasaysayud a kinnayammettayo, siwayawayakayo nga umay iti pagadalan tapno agsasaritatayo. Kadagiti maannong a miting, saantayo koma nga aglangan tapno ammotayo dagiti mapaspasamak. Ken makapagtimektayo kadagiti banag a mabalin a makadalapus kadatayo wenno iti panirigantayo, saan a maikanatad.
Daytoy ti pudno: pagimbagan dagiti annaktayo ti kitkitaenmi. Saankami nga agiwaywayat kadagiti pagalagadan nga awan bendision dagiti maseknan a grupo. And we always humanize the rules. Ania ngamin, aya, a pagadalan ti awan pagalagadanna?
Sapay ta nalawag dagita a nakunak, kakabsat…
Di nagbayag, agsasarutsoten ti pannaka-like dagiti komentok. Iti met chatroom-mi, maysanmaysa ti nangablaaw kaniak ta napagtalinaedko latta ti kinalamuyot dagiti komentok.
“Ngem kuminnit a sumaniit!” innayon pay ni Sir Omar.
Immuna a nadlawak ti pannakaikkat ti komento a nagkunaanda a karuprupa ti kuarta ni Sir Omar. Sabagay, awan ditoy pagilian ti nagkomento. Adda idiay Espania.
Idi kuan, addan naawatko a PM wenno private message.
Sorry, sir… Pasensiaandakamin, sir, nailuyoskami laeng… Sorry iti nakuna ni nanang, sir…
Limmag-an pay ti riknak.
LUNES. Nakaisem dagiti kaduak idi nasaok kadakuada dagiti naawatko a PM.
Apagtalmegko ti buzzer para iti flag ceremony idi dimteng ni Sir Omar.
“We’ll have an urgent meeting before the first period!” serioso a kinunana a di pay nakastrek iti opisinana.
“Pagsasaritaantayo ti napasamak iti social media. Saanen nga isyu ti darekdek. I smell something fishy on their comments that we are money-maker! Adda kano agsingsingir iti para project tunggal grading period ngem dida met makitkita ti pappapananna!”
Nagkikinnitakami laengen.
