Footer

PAGASA, agproblema panagipakdaar no adda bagyo ta awan liniana ti telepono

VIGAN CITY – Inannugot ti officer in charge  ti ahensia a natudingan a mangpakdaar iti publiko iti panagbaliw ti panawen a saan nga accessible ti opisinada no adda sumangbay a bagyo gapu ta awan ti linia ti telepono iti opisinada iti Tapao, Sinait ditoy a probinsia.

Nadakamat daytoy ni Eddie Quitevis, officer in charge ti PAGASA, bayat ti lecture forum a naangay iti provincial capitol ditoy itay nabiit babaen ti panagkinnamayyet ti PAGASA-DOST ken ti gobierno probinsial kas panagsagana dagiti disaster coordinating council dagiti amin a local government units no adda dumteng a  kalamidad iti probinsia.

Immatendar iti nasao a forum  dagiti nadumaduma  a concerned agencies kas iti Department of Interior and Local Government, Philippine National Police, Department of Social Welfare and Development, Department of Environment and Natural Resources, Department of Agriculture ken Department of Science and Technology.

Kinuna ni Quitevis nga   inaramidda ti amin a wagas tapno maddaanda iti landline ngem kaskasdi nga awan ti telephone company a mayat a mangited iti serbisio kadakuada. 

Nupay kasta, kinuna ni Quitevis a mabalin dagiti tattao ti komuntak iti opisinada babaen ti mobile phone No. 09053470833.

Maipalagip nga immalis ti PAGASA iti Tapao, Sinait babaen ti tulong ni dati a Cong. Salaknib Baterina gapu iti problema ti nakaipasdekan ti opisinada iti Vigan City.

Iti kallabes, kangrunaan a nakababalawan ti PAGASA gapu iti saan a madagdagus a pannakapakaammo kadagiti umili iti isasangbay ti bagyo gapu iti kaawan ti linia ti telepono a pangkontakan kadakuada.

Masansan nga agdepende dagiti sumagmamano a radio stations iti weather forecast manipud iti Siudad ti Laoag.

Ngem kinuna ni Quitevis a ti laeng DWRS radio station ti pakaipaayanda iti impormasion ta daytoy laeng ti tumawtawag kadakuada no adda main-inaw a bagyo.

Bayat iti seminar, naisuro kadagiti participante ti disaster preparedness no adda  bagyo, layus, tornado, nakaro a panaggurruod ken kimat.

Naaramid ti pannakarebio ti klima ti probinsia manipud bulan ti Hulio a napasamak ti tikag idinto a panagtutudo koma agingga iti Nobiembre  a panawen ti panagapit ngem agtudotudo pay laeng. Naiyadal pay ti Gale warming a pakaigapuan ti idadakkel dagiti dalluyon uray awan ti bagyo kadagiti kabaybayan tapno mapakdaaran dagiti tumapog a mangngalap.#