Pagbayadan iti koriente, naikiddaw a maipasdek

STO. DOMINGO, Ilocos Sur – Kiniddaw ti mayor ti pannakaipasdek ditoy nga ili ti pagbayadan iti koriente tapno mapalag-anan dagiti kailianna.

Kinuna ni Mayor Lito Tadena a malaksid a mataktakda, agplete pay dagiti kailianna nga agpa-Vigan City no mapanda agbayad iti makunsomoda iti koriente ket daytoy ti gapuna a kiniddawna iti Ilocos Sur Electric Cooperative ti pannakaipasdek iti pagbayadan dagiti lumugar ditoy iti billsda iti elektrisidad.

Adda met naipasdek idi a pagbayadan iti bills ti koriente ditoy nga ili ngem saan a nagbayag.

Sakup ti Vigan City sub-office ti ISECO ti Metro Vigan a pakairamanan ti Sto. Domingo isu nga iti nasao a siudad ti pagbayadan dagiti consumers ti nasao nga kooperatiba iti billsda iti koriente.#