Tawid News Magazine

Pagindegen ti ayat iti puso

ADTOYEN ti Tawen 2021!

Iti baet ti pandemia a sangsanguen ti sangalubongan, nadanontayo manen ti sabali a tawen. Natallikudantayo met laeng ti Tawen 2020 a saan laeng a singin a kinamalas, didigra, liday ken panagbuteng ti inyegna.

Nupay kasta, intultuloytayo latta ti limmaban. Ti bimmangon. Ti immaddang para iti masakbayantayo.

Wen, saan pay a nalpas ti laban kontra iti agraraira a bayrus. Aglalo ket adda manen kabarbaro a variant daytoy. Sakbay a nalapgis ti naglabas a tawen, immabot iti agduapulo a pagilian ti nag-lockdown. Kadagitoy a nasion ti nakapaneknekan, nakatakuatan dagiti eksperto ti kaadda ti kabarbaro a rupa ti bayrus.

Iti met pagiliantayo, naibilin a dagus ti pannakaipawil ti iseserrek dagiti ganggannaet a nagtaud kadagiti nag-lockdown a pagilian. Napalubosan ketdi latta dagiti kadaraantayo a sumrek. Ngem masapul nga aglasatda iti 14 nga aldaw a pannakakuarantinas.

Isu a kasta laengen ti pannakadismaya dagiti nagawid a kailiantayo. Kamakamenda ti kunada ti Baro a Tawen iti sidong ti pamiliada. Ngem gapu itoy a baro a pammilin, saandan a naaramid daytoy. Naidiretsoda kadagiti quarantine facilities iti Kamaynilaan. Dita a palpasenda ti 14 nga aldaw.

Nagasat ketdi dagiti kailiantayo a naggapu kadagiti pagilian nga awan pay ti naireport a kaso ti baro a variant ti bayrus. Nakadiretsoda a nakaawid iti pamiliada no la ketdi negatibo ti resulta ti swab test-da.

Nasayaat met ketdi daytoy nga addang ti gobierno. Ita ta nasapa pay, inaramidnan ti rumbeng. Saan a kas idi damdamo ti bayrus a nagpangadua daytoy gapu iti mabalin nga epektona iti ekonomia. Agingga a saanen a nalapdan ti panagsaknap ti problema.

Gapu itoy baro a rupa ti bayrus, dakkel a saludsod ita no epektibo pay laeng dagiti bakuna a napaltuad dagiti eksperto. Aglalo ket mabayagan pay ti pagilian sakbay a dumteng ti inorderna kadagiti maseknan a kompania. Imbes nga ita nga Enero, naitantan inton Hunio. Gapu kano ta adda nag-drop the ball.

Kayatna a sawen, naitantan ti pannakaipagna dagiti rekititos iti panaggatang, panagorder kadagiti bakuna. Adda ahensia ti gobierno a naturog dagiti pappapel. Agingga a naunaandatayo dagiti dadduma a pagilian!

Makipila ngarud manen ti pagilian iti panaggatangna iti bakuna. Ket segun iti kaudian a report, into pay laeng Hunio a dumteng ti umuna a bikag ti bakuna.

Innem pay a bulan!

Sa ita, adda manen dayta baro a variant ti bayrus. Makapadanag manen daytoy. Numona ket saan pay nga ammo ti pudno a bunga ti bakuna iti umuna a rupa ti bayrus. Sa pay laeng pinili ti gobierno ti bakuna nga addaan laeng iti 50% efficacy ken nanginngina pay. Naipaigid dagiti addaan iti efficacy a nangatngato ngem iti 80 porsiento. Kinapudnona, 94 ken 95 porsiento ti efficacy ti bakuna ti dua a kompania. A nalaklaka pay!

Kadagiti agpalpaliiw, masirok pay ti ubing no apay a kasta. Agtaud iti Tsina ti bakuna nga addaan iti nababbaba nga efficacy. Pagaammotayon a naasideg la unay ti gobiernotayo itoy a pagilian. Kuna ngarud dagiti imbilang ti gobierno a Delawan: nailakon ti pagilian kadagiti Kusipet. Dakkelen ti utang a naimbag a nakem ti Pilipinas gapu kadagiti tulong ti nasao a pagilian. Isu a bekkeldan ti gobierno. No ania ti ibagada, isu ti masurot.

A siempre, dagus a kinontra ti gobierno dagita. Saanto kano a patengngel ti gobierno iti ania man a pagilian. Addaan iti bukodna ngipen a mangipatungpal kadagiti ammona a pagimbagan ti sapasap.

Kuna pay dagiti kritiko ti gobierno, dakdakkel la ketdi ti komision dagiti maseknan iti nasao a bakuna. Apay nga isu ti pinilida idinto a nababbaba ti efficacy-na ken nangatngato ti presiona?

Nai-drop the ball kano pay ‘tay immuna ta basbassit ti maliksab dagiti maseknan.

Pera-pera lang ‘yan, apok,  in-Tagalog pay ni Apong Sabas, piman. Uray pandemia, dagiti bukatot, didanto agsardeng nga aglamut, kunana pay.

Pagungtak la koma ni apongko. Ngem uray naulawen iti arak-nipa, saan a marubsi ti kinapudno dagiti ibagbagana.

Iti kaaddan ti bakuna iti merkado, adu ti nakaanges iti nalukay. Kamaudiananna, addan panglaban iti bayrus. Aglalo dagiti makunkuna a frontliners iti sektor ti salun-at. Isuda ngamin ti umuna a makasagrap itoy ta isuda ngarud ti ad-adda a makisangsango iti di makita a kalaban.

Ket nupay adda kunada a nag-drop the ball, tinagtagiurayda latta ti kaadda ti bakuna. Aglalo ket awan pay met ti inaprubaran ti Food and Drug Administration (FDA) kadagiti maididiaya ita a bakuna. Madama pay laeng ti nainget a panangadalda kadagitoy.

Kinapudnona, sangkakuna ti nasao nga ahensia nga ilegal ti ania man a bakuna no saanda nga inaprobaran daytoy. Aglalo idi addan sayangguseng nga addan nabakunaan iti pagilian. Kinapudnona, ininterbiu ti GMA network ti maysa a negosiante a nagkuna a nabakunaan kanon. Saan laeng nga isuna. Addada met laeng kaduana a negosiante.

Idi kuan, adda metten angaw-arimbangaw iti Senado nga addan kadakuada ti nakapabakuna. Saanda laeng a maiserioso, kasla ‘tay pagaangawanda dagiti umili, ta panaglabsing ngarud daytoy iti agdama a linteg.

Agingga a mismo a ni Pangulo Rodrigo Duterte ti nagkuna a nabakunaanen dagiti dadduma a soldado. Aglalo iti grupo ti Presidential Security Group (PSG).

Nangparnuay daytoy iti agsusupadi a kapanunotan. Nalawag kano a panaglabsing daytoy iti linteg. Maiparit ti ania man a panagusar, panagiwaras, panagilako iti ania man a bakuna, agas a saan nga aprubado iti FDA. Nadagsen ti pannusa iti asino man nga aglabsing. Aglalo no medical practitioner ti nangiwayat iti panagbakuna.

Iti sungbat dagiti maseknan, saan kano a maysa a doktor wenno narse ti nangbakuna kadagiti nasao a soldado. Isuda kano lattan nga agkakadua.

A makapaisem a sungbat…

Saan kano ilegal ti napasamak ta di met nagtaud iti pondo ti pagilian ti naigatang iti bakuna. Donasion kano.

Ti saan a masungbatan ni Harry Roque a pannakangiwat ti Pangulo, no donasion, saan kadi a maiparit iti gobierno ti agawat kadagitoy? Malagip ngamin a nainget ti pannakaipawil ti panagawat dagiti agtrabtrabaho iti gobierno kadagiti ania man a regalo ken pasuksok.   

Dagita a donasion, saan kadi a maysa a kita ti regalo?

Awan ti nalawag a sungbat ni Roque. Kasta met nga awan ti makaibaga, uray iti grupo dagiti soldado, no nagtaudan ti donasion. Awan ti mayat nga agsao. Kuna la ngarud dagiti kritiko, Tsina manen dayta! Inawatmo a sagut/donasion, saanmo nga ammo ti nagtaudanna?

Napintas met ketdi ti rason ti Malakanyang. Nayunan a nabakunaan dagiti nasao a soldado ta karaman iti trabahoda ti panagtalinaedda a nasalun-at ken saan a pangta iti salun-at ti Pangulo a bambantayanda. Kayat ti gobierno a COVID-free dagitoy a soldado tapno masigurado ti di pannakaakar ti Pangulo.

Nupay kasta, nangukrit daytoy a pasamak iti sakit ti nakem kadagiti frontliners iti benneg ti salun-at. Paagriknada, naipaigidda la unay.

Isaysayangkat met ita ti FDA ti imbestigasion. Adalenna kano no adda rumbeng a madusa itoy a napasamak.

Bareng laeng a saan manen a hokus-pokus a makuna. Pagbanagan man daytoy nga imbestigasion, mangnamnamatayo lattan iti kinapudno dagiti maseknan.

Idawdawattayo ketdi nga aggibusen ti parikut iti bayrus. Idawdawattayo nga awan koman dagiti agsasaganad a didigra itoy a Tawen 2021.

Pabaruentayo ketdi ti panagkakabsat kadagiti puspusotayo. Iti panagiinnayat, kunada ngarud, adu ti milagro a maparnuay. No agindeg ti ayat iti puso ti tumunggal maysa kadatayo, saan ngata nga agpukaw a kasla asuk ti bayrus? Ta adda nabileg nga Ima a nangiwalin kadaytoy?

Exit mobile version