Pagkarnabalan, maiyalis

VIGAN CITY – Saanen nga iti Barangay IV no di iti Barangay San Julian Sur ti pakaipasdekan ti pagkarnabalan, daytoy ti impakaammo ni Mayor Eva Marie S. Medina itay nabiit.

Kinuna ni Medina a gapu ta medio nataktak ti negosasion iti pannakaaramat ti daga iti Barangay IV ken mapanen ti tiempona para iti panagsagana iti panagpiesta ti Vigan, nakipatangda iti agtagikua iti daga iti San Julian ket nayat met daytoy isu a maiyalis ti pagkarnabalan ita a tawen.

Kinuna ni Medina a pagsayaatanna ti pannakaiyalis ti pagkarnabalan ta mausar payen ti siudad ti nagatangna a daga iti San Julian a pagserkan dagiti lugan idinto nga iti labes ti rangtay, isunto metten ti sumrekan dagiti tattao a mapan agbuya iti pagkarnabalan.

Ramrambakan ti Simbaan ditoy ti piesta ti Konbersion ni San Pablo iti Enero 25.#