Pagkiluan dagiti aglaklako iti karne, maingetan a mamonitor

NARVACAN, Ilocos Sur – Kinuna ti meat inspector ditoy nga ingetanda ti agmonitor iti pagkiluan dagiti meat vendors iti tiendaan publiko ditoy tapno saan a magundawayan dagiti aggatgatang.

Kinuna ni Richard Cabotage a nayimplimentar daytoy itay Marso 1 ket nainget ti panagbantay ti opisinada iti presio dagiti mailako a karne kalpasan ti panangipangato dagiti meat vendors ti presio ti karne ti baboy tapno husto met la ti kilo ti gatangenda.

Innayonna a mamulta dagiti aglabsing iti P500 iti umuna a panaglabsing, P1,000 iti maikadua a panaglabsing, P2,000 iti maikatlo ket no masukalan latta a suitik ti pagkiluanda, makanselan ti permitda nga aglako.

Impalgak ni Cabotage nga adda tallo nga aglaklako a nasukalanda nga adda depekto ti pagkiluanda ket napagmultada. Nupay kasta, saanna nga innaganan dagiti natiliwan a depektibo ti pagkiluanda.

Itay nabiit, impangato dagiti aglaklako ditoy ti presio ti karne ti baboy  manipud iti P140 iti P150.

Uray dagiti meat vendors iti sumagmamano nga ili iti probinsia ket impangatoda metten ti presio ti baboy iti P150 kada kilo idinto nga inkalinteganda a ngimmato ti presio ti magatangda a live weight a baboy.

Kinunada a gapu iti kinakurang ti suplay, makadanonda payen iti adayo a lugar nga aggatang iti lakoda.

Iti sabali a bangir, kinuna met dagiti hog raisers a napilitanda nga ingngato ti presio ti lakoda a baboy gapu ta ngimmina dagiti pagpakanda.

Mailaklako iti P90-95 kada kilo dagiti baboy nga agdagsen iti 100 a kilos agpangato idinto a nalaklaka ti timbangda.#