Pagkiluan, naikabil iti tiendaan ti Magsingal

MAGSINGAL, Ilocos Sur – Tapno masigurado a saan a masuitik dagiti consumers iti umisu a dagsen dagiti gatangenda a tagilako, nangikabil ti lokal a gobierno iti pagkiluan iti uneg ti tiendaan ditoy nga ili.

Kinuna ni Sangguniang Bayan Member Agustin Pichay a nangikabilda iti pagkiluan iti fish and meat section ken iti vegetable section iti public market tapno adda pangikiluan dagiti consumers kadagiti gatangenda a tagilako tapno maammuanda no husto met laeng ti timbangda.

Kinuna ni Pichay, chairman ti committee on trade and industry, a naggapu dagiti dua a pagkiluan manipud iti opisina ti Department of Trade and Industry.

Maysa ti lokal a gobierno ditoy kadagiti winarasan ti DTI iti pagkiluan bayat ti pannakaselebrar ti Kannawidan Ylocos Festival a naangay idi Enero 29 ken nagpatingga idi Pebrero 8, 2015.#