Footer

Paglakuan iti pirated DVD, CD, VCD, naraut

CANDON CITY – Ginasut a pirated a DVD, CD ken VCD ti sinamsam ti nagtipon a bunggoy ti polis ken operatiba ti Optical Media Board iti panagraut nga insayangkatda kadagiti paglakuan a nagpuesto iti ground floor ti Candon Public Market ditoy siudad idi Hulio 19.

Aganay 125 dagiti pirated a CD, DVD ken VCD ti nasamsam dagiti grupo kadagiti pagtagilakuan a Muslim dagiti akinkukua.

Innala dagiti operatiba ti OMB dagiti nasamsam a tagilako para iti umisu a disposision.

Naammuan ken ni Police Supt. Marlo Castillo, chief of police ditoy siudad, nga insayangkatda ti raid babaen ti pannakikoordinar kadakuada ti opisina ni OMB Chairman Ronnie Rickets.

Iti kallabes, nawaya ti panaglako dagiti Muslim kadagiti nalaka ngem pirated a CD, DVD ken VCD iti ground floor ti tiendaan publiko. (Danny Antalan)