Footer

Paglakuan iti produkto, panggep a maipasdek

CANDON CITY – Inwaragawag ni Diputado Eric Singson ti panggepna a pannakabangon ti maysa a trade center ditoy para iti pannakailako dagiti kangrunaan a produkto dagiti barangay ken munisipalidad iti maikadua a distrito.

“Kayatko nga iwaragawag a mangbangontayo iti permanente a trade center ditoy siudadtayo tapno adda pagibalayan kadagiti produkto nga aramidentayo, saan laeng iti Candon City no di pay iti intero a maikadua a distrito ti Ilocos Sur,” kinuna ni Singson.

Kinuna ni Singson nga addanto puesto dagiti amin nga ili iti nasao a trade center a pangidispleyanda kadagiti produktoda babaen ti gannuat a  One Town One Product.

“Saantayo koma a mapnek iti trade fair laeng, aramatentayo ketdi daytoy a mangpadur-as iti one product per barangay.  Mangpanunotkayo koma iti produktoyo iti tunggal barangay, ket  suportarandakayo tapno naan-anay a mapadur-as dayta,” kinuna ni Singson.

Kabayatanna, kas pannalaknibna iti produkto a tabako, nangipilan ni Singson iti gakat a mangituding nga agaramat  dagiti manufacturers iti saan a nababbaba ngem 75 porsiento iti produksion a tabako .

Segun iti diputado, pinutarna ti HB 2474 agsipud ta dakkel a nakaapekto iti panaglako dagiti mannalon iti produktoda a tabako ti panaggatang dagiti agparpartuat iti sigarilio iti daytoy a produkto iti China ken Malaysia.

Sabali pay a kitkitaen ni Singson ti panakaibaba ti presio ti ganagan.

Maysa kadagiti kangrunaan nga areng-eng dagiti mannalon ti kinangina ti magasto iti inputs iti panagmulada iti tabako kas iti ganagan ken pestisidio.#