Pagpabolaan iti hueteng, naraut, 24 tattao natiliw

CANDON CITY –  Nagsubli manen ti hueteng ditoy probinsia kas paneknekan ti pannakatiliw ti duapulo ket uppat a tattao iti insayangkat dagiti polis a raid iti maysa a barangay ditoy siudad idi Septiembre 5.

Iti report manipud ti provincial police office, rinaut ti Ilocos Sur CIDG, La Union CIDG, Candon police station ken PIB ISPPO ti maysa a pagbolaan iti hueteng sadiay Barangay Paras, ditoy siudad iti agarup alas dose ti malem ti nadakamat nga aldaw a nagtungpal iti pannakaaresto ti 24 a tattao bayat ti panangurnosda kadagiti koleksionda.

Nakumpiska iti pagpabolaan dagiti assorted a papelitos a namarkaan iti Jai-Alai owned by Meridien Vista Gaming Cor-poration a nakaisuratan dagiti dua a numero a kombinasion ken ti pusta; bet money nga agdagup iti P60,800.00; 5 nga electronic calculators nga addaan iti adapter; 5 a calculator nga awanan iti adapter; maysa a nangisit a  handheld radio marked “ICOM IC-V8”  with charger marked ICOM BC-146; maysa a computer; maysa a computer monitor; nangisit a computer keyboard; computer mouse, 23 nga assorted a ball pen; 3 staplers; 2 boxes staple wires; maysa a rubber stamp, ken maysa a carton ti assorted papelitos.

Naipan amin dagiti natiliw agraman dagiti nakumpiska nga items iti Ilocos Sur CIDG para iti umisu a disposision.

Iti pannakaisurat daytoy, maisagsaganan ti kaso a maikontra kadagiti natiliw.#