Tawid News Magazine

Pagsarmingantay’ koma ti pasamak iti India

NGANNGANIN maparmek ti COVID-19 iti pagilian.

Impannakkel dayta ti Health Minister ti India itay bulan ti Marso. Iti ngamin panagmonitorda, bumabbaban ti kaso ti kinapet ti bayrus iti pagilianda. Inayon pay ti kaaddan ti napartuatda a bukod a bakuna.

Adu ti naragsakan itoy.

Akuentayo met a nakariknatayo iti apal iti nasao a pagilian. Sana all, kasla kasta ti simken iti isiptayo. Makagarawdan a siwawayawaya!

Wen, a, ta iti pagiliantayo addayta latta ti panagngato ti bilang ti baro a kaso ti kinapet ti bayrus. Naisubli ngarud iti MECQ dagiti siudad a tumaytayok manen ti kasoda. Nagsubli dagiti nadumaduma a kita ti lockdown segun iti situasion ti maysa a lugar.

Immilet manen ti paggungunayan. Immilet manen ti aangsan!

Ngem ania ita ti mapaspasamak idiay India?

Kaudian a damag iti pannakasursurat daytoy, umab-abot iti nasurok a tallo gasut a ribu katao ti kapkapten ti bayrus. Saan a kada lawas, bulan wenno tawen dayta. Inaldaw! Wen, inaldaw.

Riniwriw ngarud ti nagbalin a biktima iti daytoy laeng bulan ti Abril.

Nagangayanna, naglepleppias dagiti balay-pagagasan. Saanen a mataming a nasayaat dagiti biktima iti kaaduda. Dagiti dadduma, di payen aikkan iti atension-medikal. Agkurangen dagiti doktor ken narses a mangtaming kadakuada. Pati espasio dagiti ospital. Agtalinaed lattan iti ruar dagiti biktima.

Iti kastoy a situasion, timmayok iti husto dagiti awan gasatna a biktima. Saanen nga agsarday dagiti crematorium. Didan magabenan ti kaadu dagiti biktima.

Gapu itoy, kapilitan a makremeyt dagiti biktima iti naituding nga open area. Mapuoran dagiti biktima iti panangbayabay dagiti otoridad.

Iti report, agparikut manen ti pagilian iti pangalaanda kadagiti kayo a mausar iti tradisional a pannakapuor ti maysa a bangkay. Makasaelen ti angot iti aglawlaw. Kinapudnona, iti batog a tangatang ti nasao nga area, nakapuspuskolen ti nangisit nga asuk nga agal-alibungabong.

Saanen a makita iti baba iti kapuskol ti asuk no addaka koma iti ngato!

Nakaay-ay-ay a panunoten ti kasasaad ti India ita. Maluyaan ti tunggal maysa a mangpanunot itoy.

Apay ngamin a kasta la unayen ti nagbanagan ti nasao a pagilian? Ket, ney, kas nasaon, naikannawag payen a ngannganidan maparmek ti bayrus. Adda payen bukodda a bakuna!

Ti umuna a maitudo a rason itoy ket ti panagbalin a kampante ti India. Linukayanda dagiti alagaden. Saanen a nasursurot ti nayetnag a health protocols iti sangalubongan.

Wen, a, ta naluktanen dagiti pagpallailangan. Nagdudupudop dagiti tao. Saan met ngarud a nasurot dagiti simple nga annuroten koma kas iti social distancing ken panagusar iti facemask.

Napalugodan payen dagiti religious rituals/gatherings. Iti kaadu ti deboto dagiti kakastoy nga aramid, saan manen a nasurot dagiti health protocols.

Naisayangkat pay ti eleksion iti nasao a pagilian. Banag a nagdudupudopan manen dagiti umili. Kasla awanen ti bayrus a pagbutbutngan. Asino ti di mapatangken ti nakemna no mismo a nagtaud kadagiti otoridad ti salun-at ti nagiwaragawag a maparparmekdan ti bayrus.

Am-ammo pay ti India a naburnok ti populasionna. 1.3 a bilion! Ad-adu nga amang ti umilina iti tunggal kilometro kuadrado nga espasio no idilig iti America. Aglalo kadagiti siudadna. Narigat ngarud a masurot ti social distancing no napaluk-ayanen ti panaggaraw ti tunggal maysa.

Ken iti nasao a pagilian ti nakaduktalan ti baro a baryant ti bayrus. Baro a rupa ti kobid a napardas ti pannakayakarna.

Nagangayanna, timmayok a timmayok dagiti nagbalin a biktima. Iti uneg laeng ti makabulan, riniwriwen dagiti nakapet ti sakit.

A nangibunga ita iti health crisis iti nasao a pagilian. Naireport pay ngarud nga agim-importen daytoy iti suplay nga oksiheno. Agkurangen ti maipaay dagiti ospital kadagiti nakaro a kinapet ti sakit. Takawenda payen dagiti oxygen tank!

Ita, maip-ipit payen dagiti kailiantayo iti nasao a pagilian. Kayatdan ti agawid ngem maamakda unay a rummuar iti yanda. Iti kaadu dagiti nakapet ti bayrus, dida kano masigurado a dida maakaran no kasta a rummuarda. Agpatpatulongda iti gobiernotayo tapno natalged ti panagawidda.

Daytoy a napasamak ken mapaspasamak iti India, agpaay koma a pagsarmingantayo amin. Iti apagkirem a panagbaybay-atayo, mabalin a lak-amentay met daytoy.

Saan laeng nga akem ti gobierno daytoy. Kas umili, rebbengna laeng ti pannakibadangtayo amin. Saan nga agbalin a natangken dagiti ulotayo.

Naibilinen ti gobierno ti pannakainget ti iseserrek iti pagiliantayo dagiti nagtaud iti nasao a pagilian. Addang daytoy tapno uray kaskasano, saanen a makagteng kadatayo ti baro a baryant ti bayrus a nagtaud sadiay.

Kitaentayo ti aglawlawtayo. Wenno iti komunidadtayo.

Addada met idi ili nga awan ti kasona iti bayrus, di kadi? Ket inap-apalan met dagiti dadduma. Kasta koma met ditoy ilimi, mabalin pay a nakunatayo.

Ngem ania ita ti situasion? Dagitoyen nga ili ti yan ti dakkel a bilang ti kaso ti bayrus. Saanen nga agtaltalna dagiti lokal nga opisialda a mangipatpatungpal kadagiti nabaybay-an a pagalagadan. Saandan nga agsarsarday a mangipakpakat kadagiti ammoda pay a nayon nga addang tapno matiped ti panagngato latta dagiti baro a kaso.

Ita, kitaentay a nalaing. Apay ngata a nagbalin a kasta dagita a nasao nga ili? Wenno barangay? Wenno probinsia?

Rumrummuar a pumada iti India ti napasamak, di kadi? Adda daytay panagbalin a kampante ti tunggal maysa. Limmukay met dagiti otoridad. Saanen a nainget ti pannakaipatungpal dagiti health protocols.

A di koma maitutop!

Aglalo ket agkurkurang latta ti suplay ti bakuna iti pagiliantayo. Parikut pay laeng ti pagilian no kasano a mabakunaan ti kaaduan kadagiti umilina.

No kasta ngarud, rumbeng la unay ti panagtudio. Obserbaren a kanayon dagiti pagalagadan.

Kadagiti met otoridad, ipatungpalda a sipupuso ti pannakasurot dagiti protocols.

Labantay amin daytoy, kailian. Saantayo la ketdi a kayat ti maitulad iti India. Bangungot daytoy a ditayo kayat a mapasamak.

No kasta ngarud, disiplina iti bagi ti masapul. Sumurot kadagiti pagalagadan.

Iti apagkirem, mabalin a mapasamak kadatayo ti kas iti India, dayta koma a kanayon ti laglagipen. Binnadang ti kasapulan para iti daytoy kabusor a di maimatangan!


Exit mobile version