Pagsasao a ramen ti biag

NAMARIS ti biag. Nupay kasta, adda iti maysa a parsua a mangsukog iti namaris a panagbiagna. Iti sabali a pannao, tunggal parsua, daliasatenna dagiti nasiit ken nabato a dalan, kalay-atenna dagiti bantay, raatenna dagiti kabakiran tapno tuntonenna ti bukodna a kinatan-ok. Kasta ti biag.

Adda dagiti pagsasaotayo a ramen ti biag. Makaammokan, kaka, a mangarisit iti maregmeg ti balitok a masukay kadagitoy sumaganad.

  • Ti tao ammona ti dalan nga agturong iti impierno ngem saanna nga ammo ti rum-muaranna agingga iti naisal-danan ti kararuana iti demonio.

  • No maiparis ti biag iti maysa a gilingan, usarentayo koma ngarud a mangasa iti kababalin ken ugali. Electric grinder ti masapul dagiti agtutubo a nayaw-awan kadagiti nasayaat a sursuro tapno natadtadem a mang-pungtil iti dakes nga aramidda.

  • Nasayaat a pangulo daytay ammona ti dalan ken ammona nga ipakita no sadino ti yanna. Ngem iti agdama, dagiti dadduma a pangulotayo ket saandan nga ammo daytoy a prinsipio. Ti dalan ti maka-ammon a dumanon kadakuada.

*Ti kinapasnek nga agtra-baho para iti panagbiag ken iti masakbayan ti kasayaatan a puonan ti tao. Ngem saantayo koma nga agtrabaho iti napalalo a pati pamiliatayo ken salun-attayo ket mabaybay-antayo. Ta dinto ket ti pagtungpalantayo ket innem a kadapan iti uneg ti daga.

  • Uray kasano ti kinadakes ti maysa a tao, adda latta kinaimbag iti kaungganna. Kasta met ti tao a nasingpet a makuna, adda latta kinadakes nga iduldulinna. Dagitoy naud-udi a klase ti tao dagiti makunkuna nga ipokrito ken uleg ti sosiedad.

  • Ayatentayo ti padatayo a tao a saan ket a dagiti nailu-bongan a banag. Ta dagitoy ket naikari laeng nga usaren para iti tao a saan ket a ti padatayo a tao ti intayo usaren para laeng iti personal a pagsayaatantayo.

  • Nasiit ti dalan nga agturong iti balligi. Tapno ngarud makapagnaka iti dayta a dalan, arbasam ken dalusam. Saanmo a panunoten a lapped dagita a siit no di ket maysa a karit a makapagdaliasat a naannayas iti dana ti biag.

  • No ti maysa a tao ket nalaing nga aguyaw ken manangumsi iti padana a tao, dayta a tao ket awan ammona ken awan ti maitultulongna iti padana a tao ken iti kagi-mongan.

  • Adu dagiti politiko a no napagasatandan nga agturay/mangituray kadatayo, saan-dan a maulit pay ti sumarungkar iti nanumo a lugartayo. No idi katibok ti eleksion ket sinalsallabaydaka ken dinakdakulap, itan ta naragpatdan ti kalikagumda, dida payen ammo a taliawen dagiti botante a nakautanganda iti puestoda. Kayarigan dagitoy a politiko a dida ammo a taliawen ti nalikudanda iti nalaes nga ikan, a kas kuna ni Dr. Jose Rizal.#