Pagtaengan dagiti nataengan, maipasdek

MAGSINGAL, Ilocos Sur – Impakaammo ni Gob. Deogracias Victor “DV” Savellano a mangipasdek ti gobierno probinsial ti Ilocos Sur iti maysa a balay para kadagiti abandonada a lallakay ken babbaket ditoy nga ili.

Segun iti gobernador, nakitana ti rigat dagiti lolo ken lola nga awan ti mangtartarabay kadakuada isu't gapuna nga ituloyna ti inrugina idi a proyekto idi nagtakem a gobernador idi 2001.

Kinuna met ni Mayor Arlyn Favis a maragsakan itoy nga impalgak ti gobernador aglalo ta iti ilina ti pakabangonan ti Home for the Aged idinto nga innayonna a dakkel a tulong ti nadakamat a proyekto saan laeng a para kadagiti kalugaranna no di pay kadagiti agnaed iti umuna a distrito ti probinsia.

Gapu iti daytoy, indonar ni Favis ti makinlikud a paset ti district hospital a kukua ti lokal a gobierno ditoy a pakaipasdekan ti istraktura.

Kinuna ni Favis a kapatangna ti gobernador tapno ammuenna ti maitulong ti LGU iti nadakamat a proyekto.

Plano pay ti gobernador a maaddaan kadagiti pribado a kuarto ti maipasdek a balay dagiti nataengan tapno agbalin nga income generating daytoy.

"Babaen itoy a proyekto, maipakitatayo nga adda pay laeng serbi da lolo ken lola iti komunidad ket rumbeng laeng a maipaayanda iti nasayaat a pannakataming ta amintayo ket lumakay ken bumaketto met," kinuna ni Savellano.

Kinunana a saan koma a maawanan iti namnama dagiti nabaybay-anen a nataengan a a kitaen ti administrasion ni Savellano ti pagsayaatanda agingga a sibibiag dagitoy.

Indauluan pay ti gobernador ti pannakadalus ti aglawlaw ti Magsingal District Hospital ta maigiddan metten ti pannaka-rehabilitate dagiti saanen a maar-aramat a kuarto ti rural health unit.#