Footer

Pagtaengan, natakawan

STA. LUCIA, Ilocos Sur – Maysa a balay iti Barangay Catayagan ditoy nga ili ti sinerrek dagiti mannanakaw idi parbangon ti Hunio 25 ket kinasakasda dagiti kuarta, selpon, kamera, laptop ken dadduma pay nga alikamen.

Nagpulong iti polis ni Florante Ramos y Saldevar, 61, naasawaan, ken residente iti nadakamat a barangay, a sinerrek dagiti di nabigbig a mannanakaw ti balayna ket intarayda ti kuartana nga agdagup iti P5,000.00, 7 a selpon, 2 a kamera, maysa nga Apple Ipad, maysa nga MP3, maysa a HP laptop, maysa nga Acer laptop, ken maysa a Swatch a relo nga agbalor amin iti sumurok kumurang P163,000.00.

Kinuna ni Ramos a naduktalanna ti panagtakaw idi mapan umisbo iti ruar iti agarup alas 3:00 ti parbangon ti nadakamat a petsa idi makitana dagiti personal belongings ti baketna ken dagiti annakna a naiwarawara iti ruar ti akinlikud a ridaw ti balayda.

Iti pannakaisurat daytoy, awan pay ti pamalpalatpatan dagiti polis no asino ti nangiwayat iti panagtakaw.#