Pagtaengan, nauram

MAGSINGAL, Ilocos Sur – Maysa a balay ti nauram ditoy nga ili idi malem ti Enero 9, gapu iti mapapati a panagliway ti bumalay.

Nauram ti balay ni Esperanza Oandasan, 68, balo, residente iti Barangay San Basilio ditoy nga ili idi agarup 1:24 ti malem idi Enero 9 gapu iti mapapati a panangliwayna iti lutlutuenna.

Kalpasan a naawatda ti report, nagresponde dagiti bombero  ditoy iti nadakamat a barangay ket iniddepda ti apuy kalpasan ti sumagmamano a minuto.

Mapapati a pinanawan ni Oandasan ti lutlutuenna ket idi agsubli, sumsumgeden ti balayna.

Mapattapatta nga agpateg iti P50,000 ti nadadael iti uram.#