VIGAN CITY – Mapapati a saan a naikkat a plug ti plantsa ti nakagapu iti pannakauram ti maysa a balay iti Purok 3, Barangay Pantay Daya ditoy siudad idi malem ti Nobiembre 23.
Segun ken ni Cesar Almondia y Evangelista, 24, apo ni Eusebio Almondia y Ragunton, 78, naasawaan, akinkukua iti nauram a pagtaengan, adda nangegna a bimtak iti maysa kadagiti kuarto ti balay ken nakitana a mauramen daytoy isu a nagpaarayat kadagiti kaarrubada.
Mapapati a saan a naikkat ni Alma Almondia y Rafanan, 29, naasawaan, ken daughter-in-law ni Eusebio, ti plug ti plantsa nga inkabilna iti rabaw ti ikamen.
Nasurok treinte minutos sakbay a nadepdep dagiti nagresponde a bombero ditoy siudad ti uram.
Di pay ammo ti pateg ti nadadael a sanikua gapu iti uram.#
