Pagtagilakuan, natakawan

VIGAN CITY – Sabali pay a  pagtagilakuan ti natakawan ditoy siudad idi rabii ti Disiembre 10.

Nagpulong iti polis ni Priscila Alquiza y Parilla, naasawaan, akinkukua ken manedier ti Alquiza Farm and Poultry Supply a masarakan iti Alcantara Street, Barangay VIII ditoy siudad a natakawan ti pagtagilakuanna ket kinasakas dagiti mannanakaw ti kuarta a naikabil iti drawer ti lamisaan.

Iti panagimbestiga dagiti polis, naduktalan a simrek dagiti suspek iti pagtagilakuan babaen ti pananggettengda iti sim a diding ket ditoyda met laeng a rimmuar.

Kinasakas dagiti mannanakaw ti naglakuan ti pagtagilakuan a sumurok-kumurang P20,000.

Nakarekobre dagiti inbestigador iti uneg ti pagtagilakuan ti maysa a travelling bag a naglaon kadagiti toiletry a pakairamanan ti bath soap, detergent bar, bandage, sipilio, tualia ken stainless a paginuman a baso.

Kinuna ti polis nga adda pangrugianda nga agimbestiga agsipud ta iti rabaw ti kaha ti sabon a pagdigos ket adda naisurat a nagan a Reynaldo Torres ti Moncada, Tarlac.

Idi napan a bulan, adda dagiti naisayangkat a panagtakaw kadagiti pagtagilakuan ditoy siudad a tagasabali a probinsia dagiti masuspetsa a nagisayangkat.

Idi Nobiembre 21, nasukalan dagiti polis ni Warren Isalado y Ibayan, 35, residente iti Poblacion Tocucan, Bontoc, Mt. Province  ken ti kaduana nga innagananna a ni Rolando Bautista, residente iti Santiago, Isabela, iti akto a panangpanggepda a mangserrek iti Pintel Computer Shop iti Salcedo Street, Barangay III, ditoy siudad.

Natakawan pay ti Footsteps Store idi Nobiembre 7 a nakakasakasan ti P23,000. Nabigbig ti suspetsa a ni Carl Earl Lawrence Viesca y Magno, taga De Leon Street, San Antonio, Nueva Ecija.#