Pagtreningan dagiti atleta, agkurkurang

VIGAN CITY – Nababa ti ranggo ti probinsia iti Region 1 Athletic Association Meet (R1AA) gapu iti panagkurkurang dagiti ramit ken venue a pagtreningan dagiti atleta, segun iti ama ti probinsia itay nabiit.

Kinuna ni Gov. Ryan Singson a ti kinakurang dagiti ramit ken venue a pagtreningan dagiti atleta iti swimming, archery ken gymnastics, awan ti nakisalip kadagitoy a kategoria iti R1AA a nagresulta iti nababa a ranggo ti Ilocos Sur iti nasao a paay-ayam.

Nupay kasta, kinuna ni Singson a madama ti pannakatarimaan ti dati a swimming pool ken addanton “balay” dagiti atleta apaman a malpas ti renobasion ti Quirino Stadium.

“Adda kabaelan dagiti atletatayo isuna laeng ta agkurkurangtayo iti gamit ken venue a pagtreninganda,” kinuna ni Singson.#