Pakailakuan dagiti paputok, nainget a bantayan ti PNP, BFP, CPSO

VIGAN CITY – Istrikto a bantayan ti Philippine National Police, Bureau of Fire Protection ken ti City Public Safety Office ti panaglakuan dagiti paputok tapno awan ti mapasamak nga uram ditoy siudad iti panangselebrar iti Paskua ken baro a tawen, daytoy ti impaganetget ti city fire marshall itay nabiit.

Kinuna ni Vigan City Fire Marshall Floro Obrero a naituding manen a pakailakuan dagiti paputok iti Barangay Santa Elena (Barangay 8) a masarakan iti laud a paset ti Minibus and Jeepney Terminal.

Segun ken ni Obrero, agbantay dagiti polis, bumbero, ken kameng ti CPSO iti nadakamat a lugar tapno siputanda ti pannakailako dagiti paputok iti nadakamat a lugar mangrugi inton Disiembre 15 agingga iti Disiembre 31 manipud iti alas 8:00 ti bigat agingga iti alas 6:00 ti malem. Kalpasan ti alas 6:00, maipariten ti panaglako iti paputok.

Pinalagipan ni Obrero dagiti kustomer a saanda  a mangikuyog  iti lighter, pusporo wenno nasindian a sigarilio no mapanda gumatang iti paputok iti Santa Elena.

Idi 2009, maysa a balay iti puseg ti siudad ti dimmapo gapu iti paputok sumagmamano a minutos kalpasan ti isasangbay ti Baro a Tawen a nakatayan ti akimbalay.

Kabayatanna, nangisayangkat ti BFP, DTI ken PIA iti inspeksion kadagiti nadumaduma a pagtagilakuan ditoy siudad tapno masigurado no sinurotda met laeng dagiti paglintegan, nangruna dagiti tagilakoda a christmas lights.

Kangrunaan a sinukimat dagiti grupo no adda met laeng  import commodity clearance (ICC) sticker ken Philippine Standard (PS) a naipigket kadagiti tagilako a christmas lights a naggapu iti sabali a pagilian, kas pammatalged a nakapasada iti paglintegan ti Philippine National Standard (PNS) ken pagbatayan ti Bureau of Product Standard (BPS).

Dagiti dadduma pay a marka a kasapulan a kitaen dagiti kustomer sakbayda a gatangen ti produkto: PS Quality Mark ken PS Safety Mark a maikabil kadagiti produkto nga agaramat iti elektrisidad.#