sinursuran-banner-sqSinursuranNi Jobert M. Pacnis

Palaemen ti Baro a Tawen a Siiisem

Sinursuran:  Kolum ni Jobert M. Pacnis

 

Maysa kadagiti nabalitokan nga ugalitayo nga Ilokano ti tagnawa wenno bayanihan iti Tagalog. Malagipko dagiti proyekto ti nanumo ken bassit a pagadalanmi (Aparri West National High School). Iti nabiit pay a kaaddak ditoy, tinawen a mangisayangkat iti “bayanihan.” Ket saan laeng a mammaminsan. Sabali laeng dayta Brigada Eskuwela a paset ti sangapagilian a programa ti Departamento ti Edukasion.

Agarup limapulo metro laengen ti kaadayo ti pagadalanmi iti kadaratan ti baybay. Diretso ti parais ti baybay kadagiti pasdek ta innalan ti baybay dagiti kabalbalayan ken muymuyong iti nagbabaetan. Gapu itoy, naglaka a kanen ti lati dagiti sim nga atep; uray payen dagiti bisagra. Di pay matawenan dagiti atep, buttawen dagitoy uray pay kappinta sakbay a maikapet.

Ket tunggal masuktan dagiti atep, nga agtaud kadagiti as-asitganmi– ta bassit-usit met laeng ti pundo ti pagadalanmi– dagiti nagannak ken dadduma pay nga stakeholders ti makaammo nga agikapet kadagitoy iti wagas a tagnawa.

Itay laeng napan a tawen, narugianen ti pannakasukat dagiti atep iti heat shield (nga agpaut iti nasurok a duapulo a tawen sakbay nga agrakaya). Amang a nanginngina dagitoy ngem iti sim/yero. Ngem gapu iti ayat nga adda iti puso ti administrasion ken dagiti stakeholders, napaadda dagitoy para iti pagimbagan dagiti ubbing. Iti walo a dagup dagiti kuarto dagiti ubbing, uppat kadagitoyen ti naatepan iti heat shield. Manamnama a sakbay nga agngudo ti agdama nga school year, tallo pay a kuarto ti maileppas a maatepan. Ket babaen amin daytoy ti “bayanihan.” Ti mainut iti sueldo, mailatang laengen kadagiti dadduma pay a kasapulan dagiti ubbing a kas met laeng iti kallabes. Iti pannakaitalek iti pagadalan ti proyekto (dagitay di lumbes iti P100 000), nakainutkami iti immanay a naigatang iti duapulo ket lima a tugaw a para kadagiti ubbing.

Saan laeng nga iti pannakasukat dagiti atep nga ipakpakita dagiti stakeholders ti ayatda iti pagadalanmi. Kadagiti lima a feeder barangays (Linao, Bisagu, Bulala Norte, Bulala Sur ken Navagan), mabalin a kunaen a pitopulo porsiento, wenno nangatngato pay, kadakuada ti pada a nanumo. Ngem daytoy a kinanumoda, isu met ti kinabaknang ti ayatda a kanayon a sidadaan nga agserbi iti pagadalan.

Ita, iti pagadalan dagiti annaktayo, impamatmattayo kadi met laengen ti ayat wenno sidadadaan a pannakibadangtayo itoy? Wenno addatayo laeng nga agsisiim iti mabalin a pangumsiantayo kadaytoy? Wenno nagbalintayo a babantot iti mismo a pagsaksakduan ti sirib dagiti annaktayo?

Puera delos buenos a kunada, ngem adu a nagannak ti kasta. No adda ipakat, iwayat ti pagadalan ti anakda a proyekto, aglemmengda, dida lumtaw wenno saanda a tumulong. Inton adda makitada bassit, aglalaoken a sao ti paruarenda. No adda met pagimbagan, pagsayaatan a maangotda iti pagadalan, saanda met ngarud nga agpaudi a kunam la no awan ti inar-aramidda iti kallabes

Malagipko ket ngarud dagiti naynay a mapaspasamak no kasta a Christmas party dagiti ubbing. Adu dagiti sumanao a nagannak no mapagpapatangan ti apag ti tunggal maysa iti mapasamak a sangkabassit a ragragsak (kadawyan daytoy a pasamak iti elementaria). Tumanabutobda. Inton matinong ti masurot, isudanto latta dagiti nasubeg, nakulbet nga agtungpal. Ngem dina kayat a sawen a di matungpal ti ania man a ragragsak nga adda sangkabassit a mapagsasanguan kalpasanna.

Ti nakaay-ayat a nakasursuron ditoy, no asino dagiti nakulbet ken adu ti nasasaona, isudanto dagiti makaadu kadagiti sagana dagiti ubbing. Aginkukuyogdanto kadagiti annakda. Siempre, asino met a mannursuro ti mangpagawid kadakuada ta dida nailak-am? Ket isudanton ti makaadu— agiyawidda pay!

No maikkat koma dagitoy nga aramid, anian a nagsayaat. Aramaten koma ketdi ti adda kadatayo iti pannakapatan-ay ti paggargarawan, saan laeng nga iti bukod a pagimbagan.

Wen, sumrektayo manen iti sabali a tawen ti biagtayo. Ita pay laeng, isaganatayon ti bagitayo kadagiti nadumaduma a pagteng a mabalin a masagangtayo. Iti pannagnatayo itoy a lubong, saan a bin-ig a rosas dagiti madalanantayo. Di maawan dagiti siit a pasalsali. Ngem dagitoy ti mangpasam-it iti biag, kas pagaammotayo. Iti di yiibbet iti Dios, dagitoy a siit didatayto daleben iti dalan.

Ngarud, intay’ palaemen ti Baro a Tawen a siisem. Ania man ti adda a kasasaad iti biag, addaantayo iti karbengan nga agragsak. Ti isem, paksiatenna dagiti negatibo a bambanag nga umar-arubayan. Apay ngarud a ditayo imeten daytoy iti inaldaw-aldaw a panagbiagtayo?

Nasalun-at ken nalabon a Baro a Tawentayo amin!#