Footer

Palimed ti panagballigi ti maysa a maestra, sinalaysay ti VNHS East Principal

VIGAN CITY – Naindaklan a padas a nakatubayan iti ayat ken reggetna nga agbalin a maestro ken ina ti panangisurona iti eskuela Katolika iti lima a tawen idi katurturposna iti kolehio a namagbalin kenkuana a naanus ken napasnek iti bokasionna kas educator ken principal iti high school.

Dagita ti imburay ni Mrs. Anita Rafanan Presto, School Principal ti Vigan National High School – East, iti Brgy. Nagsangalan, Vigan City, kabayatan ti pannakiuman kenkuana dagiti kameng ti Ilocos Sur Integrated Press iti linawas a Kapihan iti Amianan Media Forum a maipabpabuya iti Iluko Heritage Channel 16 ti Eagle Vision Cable Television, kas paset ti pannakarambak ti Bulan dagiti Mangisursuro.

Sinalaysay ni Mrs. Presto a nagtaud iti napanglaw a pamilia iti Vigan, ken adu a rigat dagiti nagannak kadakuada a nangisakad ti panagadalda ket adda dagiti gundaway a magmagna a mapan agbasa ken awan pulos ti allowance wenno balonna, ken napilitan pay a nagsardeng iti dua a tawen gapu ti karigat ti kasasaadda. Idi nagturpos iti kolehio, sigud a nangisuro sadiay St. Joseph Institute, Candon, Ilocos Sur, ti eskuela a tartarawidwidan dagiti madre ti Sisters of St. Paul of Chatres a nakariknaanna a ti panangisuro ket saan laeng a propesion, ngem maysa a bokasion nga awis ti Dios a panangiturong ken panangiwanwan kadagiti ubbing ken agtutubo tapno agbalinda a responsible a kameng ti kagimongan ken tumanorda a namnama ti pagilian.

Sinalaysayna a kas principal ti VNHS – East, ket adu dagiti problema nangruna ti galad ken kababalin dagiti estudiante, ken kaadu dagiti tinawen nga in-inut a panagsardeng iti dakkel a bilang dagiti agad-adal gapu kadagiti nagduduma a gapu kangrunaanna ti kinarigat ti panagbiag. Binalakadanna dagiti estudiante nga ipasnek ken ikagumaanda ti agadal tapno naraniagto ti masakbayanda nangruna ita a panawen a kasla awanen ti nasayaat a kaimudingan dagiti awan iti adalna. Pinalagipanna met dagiti nagannak nga ikarigatanda nga isakad dagiti annakda iti panagadalda tapno makaturposda ken maaddaandanto iti nasaysayaat a kasasaad ket isudanto ti pagsanggiranda no dumteng ti panawen nga agsalog ti pigsada.

Mabigbig ni Mrs. Presto kas maysa a pagwadan nga ina ta nagturpos a Summa Cum Laude iti University of the Philippines, ken napadayawan nga outstanding youth ti Vigan City, ken addaan metten ti nasayaat a trabaho ti anakna. Inaklonna a ti karagsakan a paset ti panagbalin a nagannak ket no makita ti nagrigrigatan nga anak a napatanor a nasayaat ken agballigi iti panagbiagna.

Sinupiatna ti reklamo dagiti dadduma a mangisursuro nangruna kadagiti agkabannuag iti kinarigat ken kinaadu ti trabahoda, ken kinababa ti sueldoda. Impaganetgetna a ti panagbalin a mangisursuro ket kasapulanna iti anus ken panagibtur kadagiti annongen, ken saan laeng a nangato a sueldo ti kapatgan a gunggona ngem ti pannakakita kadagiti adalan a makaturposda iti kursoda ken agballigida iti propesionda, ken malaglagipdanto dagiti naglabas a maestro wenno maestrada. Binalakadanna dagiti mangisursuro nga ub-ubing ngem isuna nga ikagumaanda ti agbiag a nasimple, ken liklikanda ti aggasto iti ad-adu ngem ti masapulanda tapno saanda a marigatan iti panagbiag ken mailumlon iti utang.

Impakaammo ni Mrs. Presto a kas kadagiti kaaduan a public schools, adu dagiti problema ti pagadalan nga imatonanna nangruna iti pondo kadagiti kasapulan ti eskuela ken dagiti estudiante ta saan nga umanay ti it-ited ti Department of Education, isu a dakkel a tulong dagiti nagannak, komunidad ken ti City Government tapno mapataud dagiti dadduma a kasapulan ti pagadalan.

Ti VNHS East ket maysa kadagiti tallo a public high school iti Vigan City: Ti VNHS West, ken ti Ilocos Sur National High School. Nabangon ti pagadalan idi 1992, ken nagturpos iti 1997dagiti umuna a batch. Iti agdama, addaan iti estudiante a nasurok 900, ken 35 a personnel, pakairaman dagiti uppat a non-teaching position, 26 a faculty members, ken lima a security and utility personnel. Addaan pay ti pagadalan iti four storey main building ken dadduma pay a babassit a pasilidad. Nakapataud metten ti pagadalan kadagiti naballigi a nagturpos iti nagduduma a kurso iti kolehio ken naaddaan iti nasayaat a propesion. (Eden Alviar)