Palpaliiw: Idi ken Ita, Sumalaysu nga Isyo

Naisurat daytoy nga artikulo ditoy pagiwarnaktayo idi 2003, sangapulo a tawenen ti napalabas. Ngem ipablaakmi manen ta iti baet ti kaundayen dagiti naruros a tawen, kapaliiwan a dagiti napaspasamak idi ket mapaspasamak latta iti agdama;  awan ti ania a nagbaliwanda, no adda man, nagsukat laeng dagiti nagan ken lugar. Kas kuna ti maysa a miron, sumalaysu. Ania ti panagkitam, kaka? Dakayon ti manghusgar iti kinapudno ti kapaliiwanmi)

 

Senado, pagkakatawaan

 

Dandanin makabulan manipud imbulgar ni Senador Panfilo Lacsion a nagilemmeng ni First Gentleman Jose Miguel Arroyo iti agdagup iti P260 milion kadagiti nadumaduma a bangko ket sumagmamano a bank accounts ti kukuana iti nagan a Jose Pidal.

Nangipresenta pay ni Lacson kadagiti photocopies dagiti tseke ken banking statements a mangpaneknek (kano) a ni Jose Miguel Arroyo ni Jose Pidal ken kukuana met laeng dagiti accounts iti nagan ni Victoria Toh, Thomas Toh ken Kelvin Tan.

Alegasion ni Lacson a depositorio ti Jose Pidal account agraman ti account da Victoria Toh, Thomas Toh ken Kelvin Tan ti Union Bank, Bank of Philippine Islands, ken International Exchange Bank.

Ngem pinaglibakan ti Union Bank ken ti BPI nga addaan iti Jose Pidal accounts idinto a dida kayat a kumpirmaran wenno paglibakan nga addaanda iti uray ania nga account da Victoria Toh, Thomas Toh ken  Kelvin Tan. Dayta met ti inaramid ti International Exchange Bank.

Maymaysa ti rasonda: konpidensial dagiti banking records ket saanda a mabalin nga ipalgak iti asinoman malaksid iti akinkukua iti account no awan ti pammilin ti korte kas sagudayen ti Bank Secrecy Law.

Kasta met a binallaagan ti maysa nga agilinlinteg dagiti opisial ti bangko ken empleado a nangited kadagiti dokumento ken ni Sec. Lacson a panagsalungasing dayta iti Bank Secrecy Law ken  mabalin a mangibaba iti panagtalek iti sistema ti panagbangkuan.

Iti panirigan ni Sen. Edgardo Angara, saan a ni Lacson no di ti Senado ti agtignay tapno maalana dagiti mapapati a dummy accounts ti First Gentleman.

Kabayatanna, impakdaar dagiti eksperto ti Philippine National Police a pirma ni Ignacio Arroyo, inaudi a kabsat ni First Gentleman ti Jose Pidal.

Limtuad ni ub-ubing nga Arroyo ket inakona nga isu ti Jose Pidal nga akinkukua kadagiti accounts nga ibambando ni Sen. Lacson a kukua ni Fist Gentleman Arroyo.

Kinuna pay ni Ignacio Arroyo nga awan ti sinalungasingna a linteg iti pananglukatna iti Jose Pidal account agsipud ta naserraan dagitoy sakbay ti Anti-Money Laundering Law a nagepekto idi Agosto 2001.

Iti babaen daytoy a linteg, maiparit ti panagaramat iti palso a nagan kadagiti transaksion iti bangko.

Kinuna ni Ignacio Arroyo a kalpasan ti panangideklara dagiti eksperto ti PNP a pirmana ti Jose Pidal, napaay ni Lacson a mangireppet ken ni First Gentleman Arroyo iti Jose Pidal account.

“Saan a maulbod ti umili a Filipino. Ammoda ti pudpudno a Jose Pidal,” kinuna ketdi ni Sen. Lacson.

Ita, dimmawat iti sangapulo  nga aldaw a travel authority tapno mapan idiay Australia. Sigurado a mapan agkalap iti kanayonan nga ebidensia tapno mairaremna ti First Gentleman. Ngem sumagmamano nga agpalpaliiw ti nagkuna nga iti USA ti pudpudno a papanan ti senador.

Fishing expedition, kuna met ti kampo ni Arroyo.

Padaanan ngarud ti resulta ti “mision” ni Lacson iti Australia wenno iti Estados Unidos.

Inikkan ti Senate Blue Ribbon Committee ni Lacson iti lima nga aldaw a mangidatag kadagiti ebidensiana ngem awan pay uray maysa a dokumento wenno uray photocopy dagiti documents.

Ngem no talaga nga adda ik-ikutanna a dokumento a mangpatalged kadagiti alegasionna maikontra ken ni First Gentleman Arroyo, panawenen nga iruarna.

Agpayso, adda dagiti photocopies dagiti tseke ken banking statements mainaig iti Jose Pidal account ken dagiti mapapati a dummy accounts iti nagan da Victoria Toh, Thomas Toh, ken Kelvin Tanngem saan a maikonsidera dagitoy a maawat nga ebidensia.

Kabayatanna, iti imatang dagiti obispo “agbalbalin ti Senado a pagkakatawaan” gapu kadagiti adu unay a personalidad nga agimbestiga amin… malaksid iti anomaliada.

Nakababain! kuna dagiti obispo.#