Palpaliiw: Idi ken Ita, Sumalaysu nga Isyo

Ni Tatang Lakay

 

(Naisurat daytoy nga artikulo ditoy pagiwarnaktayo idi 2003, sangapulo a tawenen ti napalabas. Ngem ipablaakmi manen ta iti baet ti kaundayen dagiti naruros a tawen, kapaliiwan a dagiti napaspasamak idi ket mapaspasamak latta iti agdama;  awan ti ania a nagbaliwanda, no adda man, nagsukat laeng dagiti nagan ken lugar. Kas kuna ti maysa a miron, sumalaysu. Ania ti panagkitam, kaka? Dakayon ti manghusgar iti kinapudno ti kapaliiwanmi)

 

Naminsan pay a limtuad ti sabsabali a panagtaray ti utek dagiti agilinlintegtayo.

Kas daytoy insingasing ni Dip. Magtanggol Gunigundo a mangipila ni Pres. Gloria Macapagal-Arroyo iti separasion manipud ken ni Jose Miguel nga asawana.

No suroten ti panagtaray ti panunot ni Gunigundo, mangipila ti Presidente iti legal separation tapno maprotektaran iti makadadael nga epekto ti kontrobersia ti Jose Pidal account.

Balikas ti madanagan a diputado: : “Silensio nga agsagsagabakami.”

Nupay dina indagadag ti pannakawaswas ti kasar da Arroyo, kinuna ni Gunigundo nga epektibo a maadaywan ti Presidente ti nakaisawsawan ti First Gentleman no bingayenda dagiti sanikuada.

Kinuna pay ni Gunigundo: Sagudayen ti Artikulo 136 ti Family Code a mabalin a boluntario a kiddawen ti aggasawa iti korte a mabingay ti sanikuada.

Kinuna ni Gunigundo nga iti legal separation, saan a mawaswas ti kasar no di saanen nga agkaidda da Pres. Arroyo ken ti First Gentleman iti maymaysa a pagiddaan ken agtagikua iti kumon a sanikua.

Mabalin kano ti Presidente a suroten ti Mandela doctrine nga indiborsio ni dati a South African Presidente Nelson Mandeka ti asawana ken saan a timmulong iti pannakadepensa daytoy kadagiti pammabasol a panagkunniber.

Dinakamat pay ni Gunigundo a nasentensiaan ti asawa ni Mandela ngem saan a naapektaran a politikal ti dati a Presidente ti South Africa.

Sumangkautro met dagiti dadduma a senador a kameng ti oposision ta nakiluganda met iti singasing ni Gunigundo.

Iti biang ni Dip. Didagen Dilangalen, kasapulan nga ibaskag ti First Couple amin a sanikuada sakbay a mabingayda.

Ngem kasapulan a maammuan no asino ti pudno nga akinkukua iti Jose Pidal account sakbay a mabingay, kinuna ni Dilangalen.

Kuna met ni Sen. Edgardo Angara a masapul a maiwayat ti panagsina dagiti sanikua sakbay ti kallaysa.

Ken ni Angara, saan a mabalin a mailaksid ni Pres. Macapagal iti komunidad a sanikua ni Jose Pidal ta no ania ti kukua ni Jose Miguel Arroyo, kukua met ti Presidente, ket no ania ti kukua ti Presidente, kukua met ti First Gentleman.

Mabalin a kuna ni Gunigundo a bukodna laeng nga opinion ti naibalikasna.

Ngem no amirisen a nalaing, insingasingna dayta agsipud ta nakatuonen ti imatangna iti masungad nga eleksion.

Amken la ketdi ni Gunigundo a saan la a maapektaran ti partido a nakaikappenganna iti masungad nga eleksion gapu iti kontrobersia ti Jose Pidal account no di  pay ti bukodna a tsansa a butosan dagiti kadistrituanna.

Iti sabali a pannao, ti bukodna a pagimbagan ken pannakaisalakan iti tay-ak ti politika ti ikalkalakagna.

Kasta met ti panagpampanunot, saan laeng a sumagmamano kadagiti agilinlintegtayo. Umuna pay ti bagida santo ti partido a nakaikappenganda wenno ti pagilian a rumbeng nga umuna a pagserbianda.

Di ngarud nakaskasdaaw nga awan ti progreso ti pagiliantayo.

Kuna ti maysa a pagsasao: Ipakitam no ania ti klasem a nasion ket ibagak ti kinatao dagiti lider ti pagiliam!#