Paltog, balbala, droga, nakumpiska iti nasukisok a balay

MAGSINGAL, Ilocos Sur – Maysa a paltog, balbala ken mapapati a droga ti nakumpiska dagiti nagtitipon nga elemento ti polis iti balay ti maysa a masuspetsa a drug pusher idi malem ti Septiembre 28.

Sinukisok ti joint elements ti RAIDSOTG KEN PAIDSOTG nga indauluan ni Police Inspector Andrew Patao Rabang, Deputy PAIDSOTG, Police Inspector Heherson Isit, SPO1 Gabriel A. Labador ken
SPO1 Arnulfo Rosario, agpada a resident agents, ken ti police station ditoy, ti balay ni Elymar Ursulum y Pacleb, 42, married, ken residente iti Barangay San Clemente babaen ti bileg ti Search Warrant No. 55 s. 2011 nga inyisio ni Judge Francisco Ante, Jr. ti MTCC, Vigan City.

Nakumpiska iti balay ni Ursulum dagiti sumaganad: 5 nga aluminum strip a naglaon iti mapapati a shabu residues, ll a babassit a heat sealed plastic sachet a naglaon iti mapapati a shabu residues, 3 disposable lighters, maysa a bassit a tea bag a naglaon iti mapapati a nagango a marihuana nga agdagsen iti 5.3 grams a mapattapatta nga agpateg iti P291.50, maysa a nalabaga a plastic straw a mapapati a naglaon iti shabu residue, 9 bala ti cal 22, ken maysa a cal .22 homemade paltik revolver.

Naipan ti suspek ken dagiti ebidensia iti magsingal police station.#